High Cholesterol Eat Egg Yolks: హై కొలెస్ట్రాల్ ఉన్నవారు గుడ్డు పచ్చసొన తినవచ్చా? పాత నమ్మకాలను పటాపంచలు చేస్తున్న సరికొత్త అధ్యయనాలు..

High Cholesterol Eat Egg Yolks: గుడ్లు మన ఆరోగ్యానికి ఎంతో మేలు చేసే పౌష్టికాహారం అనడంలో ఎలాంటి సందేహం లేదు. అయితే చాలా కాలంగా ఒక అపోహ మాత్రం జనాన్ని వేధిస్తూనే ఉంది. ఎవరికైనా అధిక కొలెస్ట్రాల్ లేదా గుండె జబ్బులు ఉంటే.. వారు గుడ్డులోని పచ్చసొనను అస్సలు తినకూడదని, కేవలం తెల్లసొన మాత్రమే తినాలని చాలామంది సలహా ఇస్తుంటారు. పచ్చసొనలో కొలెస్ట్రాల్ ఎక్కువగా ఉండటమే దీనికి కారణంగా చెబుతారు.

కానీ ఈ పాత నమ్మకాలను సరిదిద్దుతూ ఆధునిక వైద్య పరిశోధనలు సరికొత్త విషయాలను వెల్లడించాయి. మనం తినే ఆహారంలోని కొలెస్ట్రాల్, మన రక్తంలోని కొలెస్ట్రాల్ స్థాయిలను నేరుగా లేదా పెద్ద మొత్తంలో పెంచదని ఈ అధ్యయనాలు స్పష్టం చేస్తున్నాయి. మరి కొలెస్ట్రాల్ ఉన్నవారు గుడ్డు పచ్చసొన తినవచ్చా? తింటే శరీరంలో ఏం జరుగుతుందో ఇప్పుడు వివరంగా తెలుసుకుందాం.

అసలు విలన్ ఎవరు? కాలేయం చేసే మ్యాజిక్ ఏంటి?

మన శరీరానికి అవసరమైన మొత్తం కొలెస్ట్రాల్‌లో దాదాపు 80 శాతాన్ని మన కాలేయమే స్వయంగా ఉత్పత్తి చేస్తుంది.

మనం కొలెస్ట్రాల్ ఎక్కువగా ఉండే గుడ్డు పచ్చసొన వంటి ఆహారాన్ని తిన్నప్పుడు.. మన కాలేయం స్మార్ట్‌గా స్పందించి, శరీరంలో కొలెస్ట్రాల్ బ్యాలెన్స్ చేయడం కోసం తన సొంత ఉత్పత్తిని దానంతట అదే తగ్గించుకుంటుంది.

అసలైన దోషులు వీరే:

రక్తంలో చెడు కొలెస్ట్రాల్ పెరగడానికి ఆహారంలోని కొలెస్ట్రాల్ కారణం కాదు. మనం తినే జంక్ ఫుడ్స్, బేకరీ ఐటమ్స్ లో ఉండే సంతృప్త కొవ్వు ట్రాన్స్ ఫ్యాట్ లే అసలైన దోషులు. గుడ్డులో ఇటువంటి హానికరమైన సంతృప్త కొవ్వులు చాలా తక్కువ పరిమాణంలో ఉంటాయని గమనించాలి.

గుడ్డు పచ్చసొనను వదిలేస్తే.. అమూల్యమైన పోషకాలను కోల్పోయినట్టే..

గుడ్డులోని తెల్లసొనలో కేవలం ప్రోటీన్ మాత్రమే ఉంటుంది. కానీ, గుడ్డుకు ఉన్న అసలైన పోషక విలువ అంతా దాని పచ్చసొనలోనే దాగి ఉంటుంది. కొలెస్ట్రాల్ భయంతో దానిని పూర్తిగా పారేయడం వల్ల శరీరానికి అందే అనేక అద్భుతమైన పోషకాలను మనం నష్టపోతాము. పచ్చసొన వల్ల కలిగే ప్రయోజనాలు ఇవే..

విటమిన్ల గని: గుడ్డు పచ్చసొనలో విటమిన్ డి, బి12, ఎ, ఇ, కె వంటి అత్యంత ముఖ్యమైన విటమిన్లు పుష్కలంగా ఉంటాయి.

మెదడు ఆరోగ్యానికి కోలిన్:

ఇందులో కోలిన్ అనే పోషకం లభిస్తుంది. ఇది మెదడు పనితీరును మెరుగుపరచడానికి, జ్ఞాపకశక్తిని పెంచడానికి మరియు కాలేయం ఆరోగ్యంగా ఉండటానికి ఎంతో అవసరం.

కంటి చూపు మెరుగవుతుంది:

పచ్చసొనలో ఉండే ల్యూటిన్, జీక్సాంథిన్ అనే శక్తివంతమైన యాంటీఆక్సిడెంట్లు వయసు పెరగడం వల్ల వచ్చే కంటి చూపు లోపాలను నివారిస్తాయి.

మంచి కొలెస్ట్రాల్ పెరుగుదల:

కొన్ని ఆధునిక అధ్యయనాల ప్రకారం, గుడ్లు క్రమం తప్పకుండా తినడం వల్ల శరీరంలో మంచి కొలెస్ట్రాల్ పెరగడానికి సహాయపడుతుంది.

కొలెస్ట్రాల్ ఉన్నవారు ఎలా తినాలి?

అధిక కొలెస్ట్రాల్ ఉన్నవారు గుడ్డు పచ్చసొనను పూర్తిగా మానేయాల్సిన అవసరం లేదు, కానీ మితంగా తినడం చాలా ముఖ్యం. అతిగా తినకుండా రోజుకు లేదా వారానికి కొన్ని చొప్పున వైద్యుల సలహా మేరకు తీసుకోవచ్చు.

వండే విధానంలో జాగ్రత్తలు:

గుడ్డు తినడం కంటే దానిని మనం ఎలా వండుతున్నాం అనేదే ఇక్కడ ముఖ్యం. గుడ్డు పచ్చసొన కంటే, దానిని ఫ్రై చేయడానికి మనం వాడే నూనె లేదా వెన్న (బటర్) అత్యంత ప్రమాదకరం. కొబ్బరి నూనెలో లేదా ఇతర నూనెలలో గుడ్లను ఎక్కువగా ఆమ్లెట్ లేదా బుర్జీ లాగా వేయించి తినడం వల్ల కొలెస్ట్రాల్ ముప్పు పెరుగుతుంది. కాబట్టి అధిక కొలెస్ట్రాల్ సమస్య ఉన్నవారికి గుడ్లను ఉడకబెట్టి తినడమే అన్నింటికంటే సురక్షితమైన మార్గం.

గుడ్డు పచ్చసొన ఆరోగ్యాన్ని పాడు చేసే శత్రువు కాదు.. అదొక పోషకాల నిధి. హై కొలెస్ట్రాల్ ఉన్నవారు కూడా ఎలాంటి భయం లేకుండా ఉడకబెట్టిన గుడ్డును పచ్చసొనతో సహా మితంగా తింటూ సంపూర్ణ ఆరోగ్యాన్ని పొందవచ్చు.