Hair Fall: షాంపూలు మార్చినా హెయిర్ ఫాల్ తగ్గట్లేదా? జుట్టు రాలడానికి అసలు కారణం ఇదే

Hair Fall: తల దువ్వుకున్న ప్రతిసారీ గుప్పిళ్ల కొద్దీ జుట్టు రాలిపోతోందా? షాంపూ మార్చినా, రకరకాల నూనెలు వాడినా హెయిర్ ఫాల్ అస్సలు తగ్గడం లేదా?

సాధారణంగా జుట్టు రాలడానికి మనం వాడే నీళ్లు, పొల్యూషన్ లేదా వాతావరణ మార్పులను కారణాలుగా అనుకుంటాం. కానీ, అసలు సమస్య మీ శరీరంలోనే దాగి ఉందంటున్నారు నిపుణులు. మనం ప్రతిరోజూ తీసుకునే ఆహారంలో ఒక ముఖ్యమైన పోషకం లోపించడం వల్లే ఇలా జుట్టు విపరీతంగా రాలిపోతుందని తాజా అధ్యయనాలు చెబుతున్నాయి. ఇంతకీ ఏంటా పోషకం? అది జుట్టుకు ఎందుకు అంత ముఖ్యం?

మన జుట్టు ఆరోగ్యంగా పెరగడానికి ఐరన్, బయోటిన్, విటమిన్ డి ఎంత అవసరమో.. 'ప్రోటీన్' (Protein) కూడా అంతే అవసరం. నిజానికి మన జుట్టు 'కెరాటిన్' అనే ఒక రకమైన ప్రోటీన్‌తోనే తయారవుతుంది. ఎప్పుడైతే మన శరీరానికి అందాల్సిన స్థాయిలో ప్రోటీన్ అందదో.. అప్పుడు మన శరీరం జుట్టు పెరగడానికి ప్రోటీన్‌ను పంపించడం ఆపేస్తుంది. దీనివల్ల జుట్టు కుదుళ్లు బలహీనపడి, ఊడటం మొదలవుతుంది.

కేవలం ప్రోటీన్ మాత్రమే కాదు.. రక్తహీనత (ఐరన్ లోపం) ఉన్నా, శరీరంలో జింక్ స్థాయిలు పడిపోయినా జుట్టు కుదుళ్లకు ఆక్సిజన్ అందక తీవ్రంగా దెబ్బతింటుంది.

మరి ఈ సమస్య నుంచి బయటపడటం ఎలా? ఖరీదైన హెయిర్ ట్రీట్‌మెంట్లు, కెమికల్ షాంపూల కంటే.. మీ రోజువారీ ఆహారంలో చిన్న చిన్న మార్పులు చేసుకుంటే చాలు. ప్రతిరోజూ గుడ్లు, మొలకెత్తిన గింజలు, పప్పుధాన్యాలు, పాలకూర, బాదం మరియు పాలు వంటి ప్రోటీన్, ఐరన్ పుష్కలంగా ఉండే ఆహారాన్ని మీ డైట్‌లో భాగం చేసుకోండి.

బాహ్యంగా ప్రొడక్ట్స్ మార్చే ముందు, శరీరానికి లోపలి నుంచి సరైన పోషకాలు అందిస్తేనే జుట్టు రాలడం తగ్గి, ఒత్తుగా పెరుగుతుందని గుర్తుంచుకోండి. సమస్య మరీ ఎక్కువగా ఉంటే ఒకసారి బ్లడ్ టెస్ట్ చేయించుకుని డాక్టర్ సలహా తీసుకోవడం మంచిది.