Change a Sanitary Pad: పీరియడ్స్ సమయంలో శానిటరీ ప్యాడ్లను ఎంత సమయానికి ఒకసారి మార్చాలో తెలుసా.. ?

Change a Sanitary Pad: మహిళల జీవితంలో ఋతుక్రమం అనేది ఒక సహజమైన ప్రక్రియ. అయితే ఈ సమయంలో శారీరక అసౌకర్యం కంటే కూడా వ్యక్తిగత పరిశుభ్రతను పాటించడం అత్యంత ముఖ్యం. చాలామంది మహిళలు ప్యాడ్ పూర్తిగా నిండిపోయే వరకు లేదా లీకేజీ అయ్యే వరకు దానిని మార్చడానికి ఇష్టపడరు. ముఖ్యంగా బ్లీడింగ్ తక్కువగా ఉన్న రోజుల్లో ఒకే ప్యాడ్‌ను రోజంతా ఉంచుకుంటారు. కానీ, ఇలా చేయడం వల్ల తీవ్రమైన ఆరోగ్య సమస్యలు వస్తాయని గైనకాలజిస్టులు హెచ్చరిస్తున్నారు.

ప్యాడ్‌ను ఎంతసేపటికి ఒకసారి మార్చాలి?

నిపుణుల అభిప్రాయం ప్రకారం, బ్లీడింగ్ ఎక్కువగా ఉన్నా, తక్కువగా ఉన్నా ప్రతి 4 నుండి 6 గంటలకు ఒకసారి ఖచ్చితంగా శానిటరీ ప్యాడ్‌ను మార్చాలి.

ఎక్కువ బ్లీడింగ్ ఉన్న రోజుల్లో: మొదటి రెండు రోజులు బ్లీడింగ్ ఎక్కువగా ఉంటే, ప్రతి 3 నుండి 4 గంటలకు ఒకసారి ప్యాడ్ మార్చడం మంచిది.

తక్కువ బ్లీడింగ్ ఉన్న రోజుల్లో : ఋతుక్రమం చివరి రోజుల్లో బ్లీడింగ్ తక్కువగా ఉన్నప్పటికీ, గరిష్టంగా 6 నుండి 8 గంటల కంటే ఎక్కువ సమయం ఒకే ప్యాడ్‌ను ఉపయోగించకూడదు.

రాత్రి సమయంలో : రాత్రి పడుకునే ముందు ఎక్కువ అబ్సార్ప్షన్ ఉన్న

ఓవర్‌నైట్ ప్యాడ్స్ ఉపయోగించవచ్చు. ఉదయం నిద్ర లేవగానే వాటిని వెంటనే మార్చేయాలి.

ఒకే ప్యాడ్‌ను ఎక్కువ సమయం ఉంచితే వచ్చే ఆరోగ్య సమస్యలు..

ఋతుక్రమ రక్తం కేవలం రక్తం మాత్రమే కాదు. అందులో గర్భాశయ కణజాలాలు, ఇతర స్రావాలు కూడా ఉంటాయి. ఇవి శరీర ఉష్ణోగ్రత, గాలితో కలిసినప్పుడు బ్యాక్టీరియా వేగంగా వృద్ధి చెందుతుంది.

లాంగ్ అవర్స్ ఒకే ప్యాడ్ వాడటం వల్ల వచ్చే ప్రధాన సమస్యలు ఇవే..

బ్యాక్టీరియా ఇన్ఫెక్షన్లు: ప్యాడ్‌పై తేమ, వేడి వల్ల బ్యాక్టీరియా చేరి యోని ఇన్ఫెక్షన్లు, యూరినరీ ట్రాక్ట్ ఇన్ఫెక్షన్లు వచ్చే ప్రమాదం ఉంది.

చర్మ సమస్యలు:

ఎక్కువసేపు తడి చర్మానికి తగలడం వల్ల తొడల భాగంలో ఎర్రటి పొక్కులు, దురద, మంట వస్తాయి.

దుర్వాసన:

రక్తం ఆక్సిజన్‌తో చర్య జరపడం వల్ల కొన్ని గంటల తర్వాత తీవ్రమైన దుర్వాసన రావడం మొదలవుతుంది.

పీరియడ్ క్రాంప్స్ - అసౌకర్యం:

పరిశుభ్రత లేకపోవడం వల్ల ఆ ప్రాంతంలో ఇన్ఫెక్షన్లు పెరిగి, పీరియడ్స్ సమయంలో వచ్చే నొప్పులు, అసౌకర్యం మరింత ఎక్కువవుతాయి.

పాటించవలసిన ముఖ్యమైన జాగ్రత్తలు..

చేతులు శుభ్రం చేసుకోవడం:

ప్యాడ్ మార్చడానికి ముందు, మార్చిన తర్వాత చేతులను సబ్బుతో శుభ్రంగా కడుక్కోవాలి.

సరైన పద్ధతిలో పారేయడం:

వాడిన ప్యాడ్‌ను పేపర్‌లో చుట్టి మాత్రమే డస్ట్‌బిన్‌లో వేయాలి. ఫ్లష్ టాయిలెట్లలో వేయడం వల్ల డ్రైనేజీ బ్లాక్ అవుతుంది.

అవగాహన ముఖ్యం:

ప్రయాణాల్లో ఉన్నప్పుడు లేదా ఆఫీసు/కాలేజీకి వెళ్లేటప్పుడు అదనపు ప్యాడ్‌లను వెంట తీసుకెళ్లడం మరువకూడదు.