Scorching Heat Alert: భానుడి భగభగలు.. చిన్నారుల్లో డీహైడ్రేషన్ ముప్పును ఎలా గుర్తించాలో తెలుసా..?

Scorching Heat Alert: దేశవ్యాప్తంగా ఎండలు మండిపోతున్నాయి. రోజురోజుకు పెరుగుతున్న ఉష్ణోగ్రతలు సామాన్యులను ఉక్కిరిబిక్కిరి చేస్తుండగా, ఈ ప్రభావం ముఖ్యంగా చిన్నారుల ఆరోగ్యంపై తీవ్రంగా కనిపిస్తోంది. ప్రస్తుతం చిన్న పిల్లల్లో డీహైడ్రేషన్ సమస్య అధికమవుతోందని ఆరోగ్య నిపుణులు ఆందోళన వ్యక్తం చేస్తున్నారు.

ఎందుకు ఈ ముప్పు?

డాక్టర్ల ప్రకారం.. వేసవిలో పిల్లలకు చెమట పట్టడం వల్ల శరీరం నుండి నీరు వేగంగా ఆవిరైపోతుంది. తగినంత నీరు తాగకపోవడం, ఎండలో ఎక్కువ సేపు ఆడటం, వాంతులు కావడం వంటి కారణాలు డీహైడ్రేషన్‌కు ప్రధాన దారితీస్తున్నాయి.

గుర్తించాల్సిన లక్షణాలు:

పిల్లల్లో ఈ మార్పులు కనిపిస్తే తల్లిదండ్రులు వెంటనే అప్రమత్తం కావాలి:

అధిక దాహం వేయడం, పెదవులు మరియు నోరు పొడిబారడం.

పిల్లలు త్వరగా అలసిపోవడం, చిరాకు పడటం.

ఆటలపై ఆసక్తి తగ్గడం.

మూత్రం తక్కువగా రావడం లేదా ముదురు పసుపు రంగులో ఉండటం.

కళ్ళు లోపలికి కుంగిపోయినట్లు ఉండటం, ఏడ్చేటప్పుడు కన్నీళ్లు రాకపోవడం.

నివారణ మార్గాలు - నిపుణుల సలహాలు:

పిల్లలను డీహైడ్రేషన్ బారి నుండి కాపాడుకోవడానికి ఈ చిట్కాలు పాటించాలని వైద్యులు సూచిస్తున్నారు..

ద్రవ పదార్థాలు: కేవలం నీటితోనే కాకుండా కొబ్బరి నీరు, మజ్జిగ, ఇంట్లో తయారుచేసిన ఓఆర్ఎస్ తరచుగా ఇస్తుండాలి.

ఎండ నుండి రక్షణ: మధ్యాహ్న సమయాల్లో ఎండలో ఆడుకోనివ్వకూడదు. ఒకవేళ బయటకు వెళ్లాల్సి వస్తే తలను టోపీ లేదా క్లాత్‌తో కప్పుకోవాలి.

ఆహారం: తేలికపాటి, పోషకమైన ఆహారాన్ని అందించాలి. పండ్ల రసాలు ఇవ్వడం శ్రేయస్కరం.

పరిశుభ్రత: ఇన్ఫెక్షన్ల వల్ల వాంతులు, విరేచనాలు కాకుండా ఉండాలంటే పరిశుభ్రత చాలా ముఖ్యం.

వైద్యుడిని ఎప్పుడు సంప్రదించాలి?

పిల్లలు విపరీతంగా అలసిపోయినా, తరచుగా వాంతులు చేసుకుంటున్నా లేదా మూత్రవిసర్జన పూర్తిగా ఆగిపోయినా ఏమాత్రం ఆలస్యం చేయకుండా వెంటనే వైద్యుడిని సంప్రదించాలి. సకాలంలో స్పందించడం ద్వారా ప్రాణాపాయ స్థితి నుంచి చిన్నారులను కాపాడుకోవచ్చు.