Short-Tempered: ముక్కు మీద కోపమా? అయితే డేంజర్‌లో పడ్డట్టే.. మితిమీరిన కోపం వల్ల శరీరంలో జరిగే ఘోరాలు ఇవే..

Short-Tempered: నవ్వు, ఏడుపుల లాగే కోపం కూడా మనుషులలో ఉండే ఒక సహజమైన భావోద్వేగం. ప్రతి ఒక్కరికీ ఏదో ఒక సమయంలో కోపం రావడం సర్వసాధారణం. అయితే కొందరికి చిన్న చిన్న విషయాలకే మితిమీరిన కోపం వస్తుంటుంది. ఇలాంటి వారు కోపంలో తమ మాటలపై, చేతలపై నియంత్రణ కోల్పోయి బంధాలను పాడు చేసుకోవడమే కాకుండా.. తమ శారీరక, మానసిక ఆరోగ్యాన్ని కూడా తీవ్రంగా పాడు చేసుకుంటున్నారని వైద్య నిపుణులు హెచ్చరిస్తున్నారు.

నిరంతరం కోప్పడటం వల్ల మన శరీరంలోని ముఖ్యమైన అవయవాలపై ఎలాంటి ముప్పు పొంచి ఉందో, ఆ ప్రమాదకరమైన పరిణామాలు ఏంటో ఇప్పుడు తెలుసుకుందాం..

కోపం వల్ల కలిగే శారీరక, మానసిక దుష్ప్రభావాలు..

గుండెకు తీవ్ర హానికరం:

అమెరికన్ హార్ట్ అసోసియేషన్ జర్నల్‌లో ప్రచురితమైన ఒక అధ్యయనం ప్రకారం.. కోపం, విచారం, ఆందోళన వంటి ప్రతికూల భావోద్వేగాలు గుండె జబ్బుల ప్రమాదాన్ని భారీగా పెంచుతాయి. మితిమీరిన కోపం రక్తనాళాల లోపలి పొర పనితీరును దెబ్బతీస్తుంది. దీనివల్ల గుండెపై అదనపు ఒత్తిడి పడుతుంది.

అకస్మాత్తుగా పెరిగే బిపి: మనకు కోపం వచ్చినప్పుడు శరీరంలో అడ్రినలిన్, నొరాడ్రినలిన్ అనే హార్మోన్లు విపరీతంగా విడుదలవుతాయి. ఇవి హృదయ స్పందన రేటును వేగవంతం చేసి, రక్తపోటును అకస్మాత్తుగా పెంచుతాయి. తరచుగా కోప్పడేవారికి హైబీపీ, గుండెపోటు వచ్చే అవకాశాలు చాలా ఎక్కువ.

జీర్ణవ్యవస్థ అస్తవ్యస్తం:

తీవ్రమైన కోపం వల్ల శరీరంలో కార్టిసాల్' స్థాయిలు పెరుగుతాయి. ఇది జీర్ణక్రియను మందగించేలా చేసి మలబద్ధకం, అజీర్ణం, కడుపు నొప్పి మరియు ఆకలి లేకపోవడానికి దారితీస్తుంది. దీనివల్ల కాలక్రమేణా పోషకాహార లోపం ఏర్పడే ప్రమాదం ఉంది.

పడిపోయే రోగనిరోధక శక్తి:

నిరంతరం కోపంగా, ఒత్తిడిగా ఉండటం వల్ల శరీర రోగనిరోధక వ్యవస్థ బలహీనపడుతుంది. ఫలితంగా వైరస్‌లు, వివిధ రకాల ఇన్ఫెక్షన్లు మనపై సులభంగా దాడి చేస్తాయి.

కండరాల నొప్పులు - తలనొప్పి:

కోపంతో ఊగిపోయేటప్పుడు శరీరం బిగుసుకుపోతుంది. ఈ నిరంతర కండరాల ఒత్తిడి కారణంగా దీర్ఘకాలిక తలనొప్పి, మెడనొప్పి, నడుము నొప్పులు వేధిస్తాయి.

నిద్రలేమి సమస్యలు:

కోపంగా ఉన్నప్పుడు మెదడు అత్యంత అశాంతంగా మారి, ఆలోచనలు చురుకుగా సాగుతాయి. ఇది ప్రశాంతమైన నిద్రకు భంగం కలిగించి, నిద్రలేమి సమస్యకు దారితీస్తుంది.

మసకబారే తార్కిక శక్తి:

తీవ్రమైన ఆగ్రహంలో ఉన్నప్పుడు మెదడు ఆలోచించే శక్తిని కోల్పోతుంది. దీనివల్ల మంచి చెడుల విచక్షణ తగ్గి, తప్పుడు నిర్ణయాలు తీసుకునే ప్రమాదం పెరుగుతుంది.

ముక్కుసూటి కోపాన్ని అదుపు చేయడం ఎలా? నిపుణుల చిట్కాలు..

మీకు విపరీతంగా కోపం వస్తున్నట్లు అనిపించినప్పుడు ఈ చిన్న ప్రభావవంతమైన చిట్కాలను పాటించండి:

చల్లటి నీరు తాగండి:

కోపం రాగానే వెంటనే ఒక గ్లాసు చల్లటి నీళ్లు తాగడం వల్ల శరీరం, మనస్సు కొంతవరకు శాంతిస్తాయి.

మౌనంగా ఆ ప్రదేశం నుండి వెళ్ళిపోండి:

ఎవరితోనైనా గొడవ జరుగుతున్నప్పుడు కోపం వస్తే, వెంటనే అక్కడి నుంచి పక్కకు తప్పుకోవడం వల్ల పెద్ద అనర్థాలు జరగకుండా ఆపవచ్చు.

లోతైన శ్వాస : ఒక్క క్షణం కళ్ళు మూసుకుని, లోతుగా శ్వాస తీసుకుంటూ "అంతా బాగానే ఉంది, ప్రశాంతంగా ఉండాలి" అని మనసులో అనుకోండి. ఇది మెదడును త్వరగా రిలాక్స్ చేస్తుంది.

ధ్యానం, యోగా: రోజూ ఉదయాన్నే కనీసం 10 నిమిషాల పాటు ధ్యానం, యోగా లేదా ప్రాణాయామం చేయడం వల్ల ఆలోచనలపై నియంత్రణ లభించి, కోపం క్రమంగా తగ్గుముఖం పడుతుంది.

కోపం అనేది ఎదుటివారి కంటే ముందు మనల్ని మనమే కాల్చుకునే నిప్పు లాంటిది. క్షణికావేశంలో వచ్చే కోపాన్ని నియంత్రించుకోవడం అలవాటు చేసుకుంటే.. అటు బంధాలను, ఇటు మన విలువైన ఆరోగ్యాన్ని సురక్షితంగా కాపాడుకోవచ్చు.