People Get Headaches While Sleeping Under an AC: ఏసీ కింద పడుకుంటే తలనొప్పి ఎందుకు వస్తుంది?.. అసలు కారణాలు ఇవే!.

People Get Headaches While Sleeping Under an AC: సమ్మర్ వచ్చేసిందంటే చాలు.. పగటిపూట భానుడి భగభగలకు తోడు రాత్రి పూట కూడా ఉక్కపోత ఉక్కిరిబిక్కిరి చేస్తుంది. అందుకే చాలా మంది రాత్రంతా ఏసీ ఆన్ చేసుకుని హాయిగా పడుకుంటారు. కానీ, ఉదయం లేవగానే కాస్త తలనొప్పిగా, నీరసంగా అనిపిస్తోందా? రోజంతా ఉత్సాహంగా సాగాల్సిన మీ ఉదయాన్ని ఆ తలనొప్పి పాడు చేస్తోందా? అయితే దీనికి కారణం మీ రూమ్‌లోని ఏసీయేనా?

నిజానికి, తలనొప్పి రావడానికి నేరుగా ఎయిర్ కండిషనర్ (AC) కారణం కాదు. కానీ రాత్రంతా ఏసీ కింద పడుకోవడం వల్ల మన శరీరంలో జరిగే కొన్ని మార్పులే ఈ నొప్పికి దారితీస్తాయి. ఇందులో మొదటిది.. కండరాలు బిగుసుకుపోవడం. చల్లటి గాలి రాత్రంతా నేరుగా శరీరంపై పడినప్పుడు మెడ, భుజాలు, తల భాగంలో ఉండే కండరాలు ఒత్తిడికి గురై బిగుసుకుపోతాయి. అందుకే ఉదయం లేవగానే మెడ పట్టేసినట్టు, నుదుటి భాగంలో ఎవరో గట్టిగా నొక్కుతున్నట్టు నొప్పి వస్తుంది.

ఇక రెండో ముఖ్యమైన కారణం.. పొడి గాలి , డీహైడ్రేషన్. ఏసీ గదిలోని తేమను లాగేయడం వల్ల రూమ్‌లోని గాలి పూర్తిగా పొడిగా మారుతుంది. ఈ పొడి గాలి వల్ల మనకు తెలియకుండానే శరీరంలో నీటి శాతం తగ్గి డీహైడ్రేషన్ ఏర్పడుతుంది. పగటిపూట సరిగ్గా నీళ్లు తాగని వారికి, మైగ్రేన్ ఉన్నవారికి దీని ప్రభావం మరింత ఎక్కువగా ఉంటుంది.

దీనితో పాటు, ఈ పొడి, చల్లటి గాలి మన ముక్కు లోపలి భాగాలపై ప్రభావం చూపిస్తుంది. ముందే సైనస్, అలర్జీలు ఉన్నవారికి ముక్కు దిబ్బడ ఎక్కువై.. కళ్ళు, నుదుటి భాగంలో విపరీతమైన ఒత్తిడి కలిగి సైనస్ తలనొప్పికి దారితీస్తుంది. ముఖ్యంగా మైగ్రేన్, ఆస్తమా, నిద్రలేమి సమస్యలు ఉన్నవారిలో ఈ ఏసీ తలనొప్పి లక్షణాలు చాలా త్వరగా కనిపిస్తాయి.

అయితే లేటెస్ట్ హెల్త్ గైడ్‌లైన్స్ ప్రకారం.. కొన్ని చిన్న జాగ్రత్తలతో ఈ సమస్యకు చెక్ పెట్టవచ్చు. రాత్రి పడుకునే ముందు ఒక గ్లాస్ గోరువెచ్చని నీళ్లు తాగాలి. ఏసీ గాలి నేరుగా ముఖంపై, మెడపై పడకుండా చూసుకోవాలి. అలాగే ఏసీ టెంపరేచర్‌ను 24 నుంచి 26 డిగ్రీల మధ్య మెయింటైన్ చేయడం చాలా మంచిది. వీలైతే రూమ్‌లో ఒక చిన్న గిన్నెలో నీళ్లు ఉంచితే గది పొడిగా మారకుండా ఉంటుంది.