Scam Alert: పెళ్లి పేరుతో మోసాలు – యువతులు అప్రమత్తంగా ఉండాలని CP సజ్జనార్ హెచ్చరిక
నిశ్చితార్థం తర్వాత దగ్గరవుతూ డబ్బు కోసం బెదిరింపులు… ఫిర్యాదు చేయాలని హైదరాబాద్ షీ టీమ్స్ సూచన
అమ్మాయిలూ.. జాగ్రత్త!!
పెళ్లి ముసుగులో కొత్త మోసాలు – యువతులకు సజ్జనార్ హెచ్చరిక
హైదరాబాద్లో పెళ్లి పేరుతో జరుగుతున్న కొత్త తరహా మోసాలు ఆందోళన కలిగిస్తున్నాయి. ప్రేమ పేరుతోనే కాదు, పెద్దలు కుదిర్చిన సంబంధాల మాటున కూడా కొందరు నయవంచకులు యువతులను మోసం చేస్తున్న ఘటనలు వెలుగులోకి వస్తున్నాయి.
ఈ నేపథ్యంలో యువతులను హెచ్చరిస్తూ హైదరాబాద్ పోలీస్ కమిషనర్ వీసీ సజ్జనార్ కీలక సూచనలు చేశారు.
మోసం చేసే విధానం ఇదే…
సజ్జనార్ వివరించిన ప్రకారం—
- ముందుగా సంప్రదాయబద్ధంగా పెళ్లి చూపులు
- ఆపై నిశ్చితార్థం
- “పెళ్లి ఖాయమైంది కదా” అనే చనువుతో దగ్గరవడం
- మాయమాటలతో ఎమోషనల్ బ్లాక్మెయిల్
- శారీరకంగా లోబరుచుకోవడం
పెళ్లి సమయం దగ్గరపడే సరికి అసలు రంగు బయటపడుతోంది.
అదనపు కట్నం కోసం భారీ డిమాండ్లు చేస్తున్నారు. ఇవ్వకపోతే పెళ్లి రద్దు చేస్తామని బెదిరిస్తున్నారు.
సజ్జనార్ స్పష్టమైన హెచ్చరిక
- నిశ్చితార్థం అయినా పెళ్లి అయ్యే వరకు అప్రమత్తంగా ఉండాలి
- “పెళ్లి ఖాయం అయ్యింది” అన్న కారణంతో శారీరకంగా కలవకూడదు
- అదనపు కట్నం డిమాండ్ చేస్తే వెంటనే ఫిర్యాదు చేయాలి
- ఎమోషనల్ బ్లాక్మెయిల్కు లొంగకూడదు
సమాజంలో పరువు పోతుందనే భయంతో చాలామంది ఫిర్యాదు చేయడానికి వెనుకడుగు వేస్తున్నారని, ఇదే మోసగాళ్లకు అవకాశమవుతోందని ఆయన తెలిపారు.
“మౌనంగా ఉంటే సమస్య పెరుగుతుంది. ధైర్యంగా ముందుకు రండి” అని సూచించారు.
సహాయం కోసం సంప్రదించండి:
ఇలాంటి ఘటనలు ఎదురైతే వెంటనే:హైదరాబాద్ షీ టీమ్స్ వాట్సాప్: 9490616555
అత్యవసర సహాయం: డయల్ 100
ఫిర్యాదు చేసిన వారి వివరాలు పూర్తిగా గోప్యంగా ఉంచబడతాయని పోలీసులు హామీ ఇచ్చారు.
