Venezuela Security Chief: మాదురో పతనం తర్వాత అమెరికా తదుపరి లక్ష్యం: వెనిజులా భద్రతా చీఫ్ డియోస్డాడో కాబెల్లో

Venezuela Security Chief: వెనిజులా అధ్యక్షుడు నికోలస్ మాదురోను అమెరికా బంధించి తీసుకెళ్లిన తర్వాత, ఆ దేశంలోని మిగిలిన కీలక అధికారులపై అమెరికా ప్రెసిడెంట్ డొనాల్డ్ ట్రంప్ దృష్టి సారించినట్లు సమాచారం. ముఖ్యంగా వెనిజులా ఇంటీరియర్ మంత్రి మరియు భద్రతా బలగాల అధిపతి డియోస్డాడో కాబెల్లోపై అమెరికా కఠిన హెచ్చరికలు జారీ చేసినట్లు అంతర్జాతీయ మీడియా వర్గాలు తెలిపాయి.

వెనిజులా భద్రతా దళాలు పూర్తిగా డియోస్డాడో కాబెల్లో నియంత్రణలో ఉన్న నేపథ్యంలో, అమెరికా డిమాండ్లకు సహకరించాలని, లేకుంటే మాదురోకు జరిగినట్లే తనకు కూడా జరుగుతుందని ట్రంప్ యంత్రాంగం హెచ్చరిస్తోంది. వెనిజులా నాయకులు అమెరికా మాట వినకపోతే, కాబెల్లోను తదుపరి టార్గెట్‌గా చేసుకుంటామని అగ్రరాజ్యం స్పష్టం చేస్తోంది. భద్రతా దళాలపై మానవ హక్కుల ఉల్లంఘనల ఆరోపణలు చేస్తూ అమెరికా ఒత్తిడి పెంచుతోంది.

ప్రస్తుతం వెనిజులా తాత్కాలిక అధ్యక్షురాలిగా బాధ్యతలు చేపట్టిన డెల్సీ రోడ్రిగ్జ్ అమెరికా డిమాండ్లకు అనుకూలంగా స్పందిస్తున్నట్లు తెలుస్తోంది. అయితే ఆమెకు, డియోస్డాడో కాబెల్లోకు మధ్య గణనీయమైన విభేదాలు ఉన్నాయి. ఈ నేపథ్యంలో కాబెల్లో ప్రభుత్వ వ్యతిరేక కార్యకలాపాలకు పాల్పడే అవకాశం ఉందని ట్రంప్ యంత్రాంగం అనుమానిస్తోంది. దీంతో ఆయనను ఆ పదవి నుంచి తొలగించే దిశగా అమెరికా ఆలోచనలు సాగుతున్నట్లు సమాచారం. అదనంగా, వెనిజులా రక్షణ మంత్రి వ్లాదిమిర్ పాడ్రినో లోపెజ్‌పై కూడా అమెరికా నిఘా పెంచినట్లు వార్తలు వస్తున్నాయి.

మరోవైపు, తాత్కాలిక అధ్యక్షురాలు డెల్సీ రోడ్రిగ్జ్ మాదురో బంధనను తీవ్రంగా ఖండించారు. మాదురో మరియు ఆయన భార్య సిలియా ఫ్లోరెస్‌ను అపహరించడం ద్వారా అమెరికా వెనిజులా ప్రజాస్వామ్యం, దేశ సార్వభౌమత్వంపై దాడి చేసిందని ఆరోపించారు. అమెరికా ఆధిపత్యాన్ని తిరస్కరిస్తామని స్పష్టం చేశారు. అమెరికా ఆపరేషన్‌లో మరణించిన వెనిజులా సైనికుల కోసం ఒక వారం రోజుల సంతాప దినాలు ప్రకటించారు.

మాదురో పతనంతో వెనిజులా రాజకీయ పరిస్థితి అనిశ్చితంగా మారింది. అమెరికా ఒత్తిడి కొనసాగుతుండటంతో దేశ భవిష్యత్తు ఆసక్తికరంగా మారింది.