Australia: ఆస్ట్రేలియా: బోండీ బీచ్ హనుక్కా వేడుకలపై దాడి... తండ్రీకొడుకులే నిందితులు!

Australia: ఆస్ట్రేలియాలోని ప్రసిద్ధ బోండీ బీచ్‌లో యూదులు హనుక్కా పండుగ మొదటి రోజు వేడుకలు జరుపుకుంటుండగా జరిగిన ఉగ్రదాడిలో 15 మంది మరణించారు. ఈ దాడికి పాల్పడిన ఇద్దరు సాయుధ దుండగులు తండ్రీకొడుకులేనని దర్యాప్తు అధికారులు గుర్తించారు. వీరి పేర్లు సాజిద్ అక్రమ్ (50), నవీద్ అక్రమ్ (24). ఇద్దరూ పాకిస్తాన్ మూలాలు కలిగినవారు. నవీద్ ఆస్ట్రేలియాలో జన్మించిన పౌరుడు కాగా, సాజిద్ 1998లో విద్యార్థి వీసాపై వచ్చి తర్వాత శాశ్వత నివాసం పొందాడు.

ఘటనా స్థలంలో పోలీసుల ఎదురుదాడిలో సాజిద్ అక్రమ్ మరణించాడు. నవీద్ అక్రమ్ తీవ్ర గాయాలతో ఆసుపత్రిలో చికిత్స పొందుతున్నాడు. పోలీసులు అతనిపై నేర చర్యలు తీసుకోనున్నట్లు తెలిపారు. సాజిద్ వద్ద 2015 నుంచి తుపాకీ లైసెన్స్ ఉండటం, హంటింగ్ క్లబ్‌లో సభ్యుడిగా ఉండటం వెలుగుచూసింది. అతని వద్ద ఆరు ఆయుధాలు ఉన్నాయి – వీటన్నింటినీ అధికారులు స్వాధీనం చేసుకున్నారు.

ఈ దాడి యూదు సముదాయాన్ని లక్ష్యంగా చేసుకున్న ఉగ్రవాద చర్యగా పోలీసులు ప్రకటించారు. నవీద్ అక్రమ్ గతంలో ఆస్ట్రేలియా సెక్యూరిటీ ఇంటెలిజెన్స్ ఏజెన్సీ (ASIO) రాడార్‌లో ఉన్నాడు. అయితే అప్పట్లో అతని నుంచి తక్షణ ముప్పు లేదని అంచనా వేశారు.

సాహసి పౌరుడి పోరాటం...

దాడి సమయంలో సాజిద్ అక్రమ్‌తో పెనుగులాట నడిపి తుపాకీ లాక్కున్న అహ్మద్ అల్ అహ్మద్ (43) అనే సిరియన్ మూలాల పౌరుడు తీవ్రంగా గాయపడ్డాడు. అతడు ఆసుపత్రిలో చికిత్స పొందుతున్నా పరిస్థితి స్థిరంగా ఉంది. అతని సాహసాన్ని ఆస్ట్రేలియా ప్రధాని ఆంథోనీ అల్బనీజ్, ప్రీమియర్ క్రిస్ మిన్స్‌లు ప్రశంసించారు. అహ్మద్ చర్య వల్ల అనేక ప్రాణాలు కాపాడబడ్డాయని అంటున్నారు. ఇందుకోసం రివార్డ్‌లు కూడా ప్రకటించారు.

ఈ ఘటన ఆస్ట్రేలియాలో గత మూడు దశాబ్దాలలో అత్యంత ఘోరమైన మాస్ షూటింగ్‌గా నమోదైంది. దీనిపై దేశవ్యాప్తంగా సంతాపం వ్యక్తమవుతోంది. తుపాకీ చట్టాలను మరింత కఠినతరం చేయాలని ప్రభుత్వం ఆలోచిస్తోంది.