H-1B Visa: H-1B వీసా: కీలక రంగాలకు లక్ష డాలర్ల ఫీ నుంచి మినహాయింపు

H-1B Visa: అమెరికా అధ్యక్షుడు డొనాల్డ్ ట్రంప్ కొత్తగా ఇచ్చే H-1B వీసాలపై విధించిన 100,000 డాలర్ల ఫీజు, భారతదేశంలో ముఖ్యంగా ఐటీ రంగంలో గట్టి ఆందోళనలను రేకెత్తించింది. ఈ నెల 21 నుంచి ఈ కొత్త నియమం అమలులోకి వచ్చింది. దీని కోసం అధ్యక్షుడు జారీ చేసిన ఎగ్జిక్యూటివ్ ఆర్డర్ ఒక సంవత్సరం పాటు గడువు ఉంది. ఈ కాలంలో అమెరికా కాంగ్రెస్‌లో చట్టం ఆమోదం పొందితే, తర్వాత పూర్తి స్థాయిలో అమలు జరుగుతుంది. భారత్ నుంచి H-1B వీసాతో అమెరికా వెళ్లే ఉద్యోగి సగటు వార్షిక జీతం 60,000 నుంచి 140,000 డాలర్ల మధ్య ఉంటుంది. ఇలాంటి పరిస్థితుల్లో ఒక్కో ఉద్యోగికి 100,000 డాలర్ల ఫీజు చెల్లించడం కంపెనీలకు చాలా కష్టసాధ్యం. ఈ భారం నుంచి ఎవరికైనా మినహాయింపులు ఉన్నాయా అన్నది ఆసక్తికరమైన విషయం.

అమెరికా ప్రాధాన్యతలకు తగినట్లు

దేశీయ ప్రాధాన్యతలు లేదా అమెరికా అవసరాలను దృష్టిలో ఉంచుకుని, కొన్ని రంగాలకు ఈ ఫీజు నుంచి మినహాయింపు ఇచ్చే అవకాశం ఉందని సంబంధిత వర్గాలు చెబుతున్నాయి. అధ్యక్షుడు జారీ చేసిన ఎగ్జిక్యూటివ్ ఆర్డర్‌లోని సెక్షన్ 1 (సి)లో ఈ మినహాయింపుల గురించి ప్రస్తావించారు. అమెరికాలోని హోమ్‌ల్యాండ్ సెక్యూరిటీ సెక్రటరీకి ఈ మినహాయింపులపై నిర్ణయం తీసుకునే అధికారం ఉంది. ఆయన తన విచక్షణను ఉపయోగించవచ్చు. అత్యంత నైపుణ్యం కలిగిన వ్యక్తులను అమెరికాకు ఆకర్షించే ఉద్దేశ్యంతో ఈ మినహాయింపు అవకాశాన్ని కల్పించినట్లు తెలుస్తోంది. వైద్యులు, మెడికల్ రెసిడెంట్లకు మినహాయింపు ఇచ్చినట్లు సమాచారం. వీరితో పాటు మరికొన్ని రంగాల్లోని అత్యుత్తమ నైపుణ్యం గల ఉద్యోగులు H-1B వీసా కోసం 100,000 డాలర్ల ఫీజు భారాన్ని తప్పించుకునే అవకాశం ఉంది.

ఫిజీషియన్లు

వైద్య, ఆరోగ్య పరిశోధనలు

రక్షణ, జాతీయ భద్రత

స్టెమ్ కార్యకలాపాలు

ఇంధనం

విమానయానం

సైబర్ సెక్యూరిటీ

ఈ కీలక రంగాల్లో నిపుణులకు సాధారణంగా ప్రత్యామ్నాయాలు ఉండవు. అప్పటికప్పుడు నైపుణ్యం గల ఉద్యోగులను ఎంపిక చేయడం లేదా శిక్షణ ఇచ్చి సిద్ధం చేయడం సాధ్యం కాదు. కాబట్టి, కంపెనీలు వీసా ఫీజు మినహాయింపు కోసం దరఖాస్తు చేసుకోవచ్చు.