Iran: అమెరికాకు ఇరాన్ ఘాటు హెచ్చరిక.. ఇజ్రాయెల్కు మద్దతు ఆపాలని స్పష్టం
మద్దతు ఆపాలని స్పష్టం
Iran: పశ్చిమాసియాలో ఉద్రిక్తతలు తగ్గించే చర్చలు జరుగుతున్న నేపథ్యంలో ఇరాన్ మరోసారి అమెరికా, ఇజ్రాయెల్లకు తీవ్ర హెచ్చరికలు జారీ చేసింది. ఇజ్రాయెల్ రక్షణ మంత్రి కాట్జ్ చేసిన వ్యాఖ్యలపై ఇరాన్ విదేశాంగ మంత్రి సయ్యద్ అబ్బాస్ అరాగ్చీ ఘాటుగా స్పందించారు.
అమెరికా తన పెంచి పోషించే ‘పెంపుడు శక్తి’ అయిన ఇజ్రాయెల్ను అదుపులో ఉంచుకోవాలని స్పష్టం చేశారు. లేకపోతే ఇరాన్ నుంచి గట్టి ప్రతిస్పందన ఎదురవుతుందని హెచ్చరించారు. పశ్చిమాసియాలో ఘర్షణలకు ముగింపు పలికేందుకు కుదిరిన 14 అంశాల అవగాహనా ఒప్పందం (MoU) ప్రకారం, ఈ ప్రాంతంలో ఉద్రిక్తతలు పెరగకుండా చూడాల్సిన బాధ్యత అమెరికాపైనే ఉందన్నారు. ఇజ్రాయెల్ చర్యలను నియంత్రించడం దీని భాగమేనని పేర్కొన్నారు.
ఒకవేళ అమెరికా తమ మాట వినకపోతే ఇరాన్ స్వయంగా ఇజ్రాయెల్కు తగిన బుద్ధి చెబుతుందని అరాగ్చీ సామాజిక మాధ్యమాల్లో పోస్ట్ చేశారు.
హెచ్చరికకు కారణం: ఇజ్రాయెల్ రక్షణ మంత్రి కాట్జ్ ఇరాన్ సుప్రీం లీడర్ మొజ్తబా ఖమేనీని మరణ శిక్షకు అర్హుడని వ్యాఖ్యానించడం, అణ్వాయుధాల అభివృద్ధికి టెహ్రాన్ను ఎట్టి పరిస్థితుల్లోనూ అనుమతించబోమని పునరుద్ఘాటించడం వంటి వ్యాఖ్యలే ఈ వివాదానికి కారణమని తెలుస్తోంది. ఈ వ్యాఖ్యలు ఇరు దేశాల మధ్య మళ్లీ ఉద్రిక్తతలను రాజేశాయి.
దోహాలో చర్చలు: అమెరికా, ఇరాన్ మధ్య పరోక్ష దౌత్య చర్చలు ఖతార్ రాజధాని దోహాలో కొనసాగుతున్నాయి. ఖతార్, పాకిస్థాన్ మధ్యవర్తిత్వం వహిస్తున్నాయి. అమెరికా ప్రత్యేక ప్రతినిధి స్టీవ్ విట్కాఫ్, ట్రంప్ అల్లుడు కుష్నర్ వంటి వారు నేరుగా చర్చల్లో పాల్గొనడం లేదని సమాచారం. అయితే ఖతార్ ప్రధాని సమక్షంలో ప్రాథమిక ఏర్పాట్లు జరిగినట్లు తెలుస్తోంది.
హెలికాప్టర్ ప్రమాదం: ఇదిలా ఉండగా, అరేబియా సముద్రంలో అమెరికా నేవీకి చెందిన MH-60S సీ హాక్ హెలికాప్టర్ అత్యవసర ల్యాండింగ్ ప్రయత్నంలో ప్రమాదానికి గురైంది. నలుగురు సిబ్బందిలో ముగ్గురిని కాపాడగా, ఒకరి ఆచూకీ కోసం అన్వేషణ జరుపుతున్నట్లు యూఎస్ నేవీ తెలిపింది. శత్రువుల దాడి కారణం కాదని స్పష్టం చేసింది.
హర్మూజ్ జలసంధిలో ఇరాన్ అనుమతి లేకుండా విదేశీ నౌక చక్కర్లు కొడుతోందని ఇరాన్ ప్రభుత్వ టీవీ వెల్లడించింది. జలసంధిపై తమ నిఘా కొనసాగుతోందని పరోక్షంగా సందేశం ఇచ్చింది.
ఈ పరిణామాలు పశ్చిమాసియా ప్రాంతంలో ఉద్రిక్తతలు మరింత పెరిగే అవకాశాలను సూచిస్తున్నాయి.
