Iran: సుప్రీం లీడర్ ఆరోగ్యంపై రూమర్లకు చెక్ – ఇరాన్‌ మీడియా వీడియో విడుదల

Iran: ఇరాన్ సుప్రీం లీడర్‌గా నియమితులైన మొజ్తాబా ఖమేనీ ఆరోగ్య పరిస్థితిపై ఇటీవల వివిధ ఊహాగానాలు, వార్తలు వినిపించాయి. ఈ ఊహలన్నింటినీ తిప్పికొడుతూ ఇరాన్ అధికారిక మీడియా ఓ వీడియోను విడుదల చేసింది. ఇరాన్ రాష్ట్ర మీడియా ఐఆర్‌ఐబీ (IRIB)లో మొజ్తాబా ఖమేనీ వీడియో ప్రసారమైంది.

ఈ వీడియోలో మొజ్తాబా ఖమేనీ కొంతమందికి మతపరమైన బోధనలు చేస్తున్నట్లు కనిపిస్తోంది. అయితే, ఈ వీడియో ఎప్పుడు రికార్డు చేయబడిందనే విషయాన్ని మీడియా స్పష్టం చేయలేదు. అమెరికా-ఇజ్రాయెల్ దాడుల్లో తండ్రి ఆయతుల్లా అలీ ఖమేనీ ప్రాణాలు కోల్పోయిన తర్వాత మొజ్తాబా బాహ్య ప్రపంచానికి కనిపించడం ఇదే తొలిసారి.

ఇటీవల మొజ్తాబా ఆరోగ్యంపై పలు ఊహాగానాలు వచ్చాయి. యుద్ధం మొదటి రోజు దాడిలో ఆయన తీవ్రంగా గాయపడ్డారని, సుప్రీం లీడర్‌గా ఎన్నికైనా బహిరంగంగా కనిపించకపోవడంతో ఆ ఊహలు మరింత పెరిగాయి. అమెరికా అధ్యక్షుడు డొనాల్డ్ ట్రంప్ కూడా మొజ్తాబా ప్రాణాలతో ఉన్నారా అని అనుమానాలు వ్యక్తం చేశారు. ఈ నేపథ్యంలో ఇరాన్ మీడియా ఈ వీడియోను విడుదల చేసి ఆరోగ్య సమస్యల ఊహాగానాలను ఖండించింది.

ఇరాన్‌పై జరుగుతున్న యుద్ధం మధ్య మొజ్తాబా ఖమేనీ బహిరంగ ప్రదర్శన లేకపోవడం అంతర్జాతీయంగా చర్చనీయాంశంగా మారింది. ఈ వీడియోతో ఆయన బతికే ఉన్నారని, సక్రియంగా ఉన్నారని ఇరాన్ ప్రభుత్వం సంకేతం ఇచ్చినట్లుగా కనిపిస్తోంది.