Vance Becoming Isolated Inside the White House: వైట్‌హౌస్‌లో వాన్స్ ఒంటరివాడా?

Vance Becoming Isolated Inside the White House: వైట్‌హౌస్‌లో మారుతున్న రాజకీయ సమీకరణాల నేపథ్యంలో అమెరికా ఉపాధ్యక్షుడు జేడీ వాన్స్ కీలక విదేశాంగ విధాన నిర్ణయాల నుంచి దూరంగా ఉంటున్నట్లు అంతర్జాతీయ మీడియా వర్గాలు వెల్లడించాయి. ఈ పరిణామాలతో 2028 అధ్యక్ష ఎన్నికల్లో పోటీ చేసే ఆయన ప్రణాళికలపై కూడా ప్రభావం పడే అవకాశం ఉందని తెలుస్తోంది.

ఇటీవల ఓ కార్యక్రమంలో వాన్స్ మాట్లాడుతూ, “తాను భవిష్యత్ అధ్యక్ష అభ్యర్థి కాదు, ప్రస్తుత ఉపాధ్యక్షుడిని” అని వ్యాఖ్యానించడం ఈ ఊహాగానాలకు మరింత బలం చేకూర్చింది. అయితే, 2028 అధ్యక్ష అభ్యర్థిత్వం కోసం వాన్స్‌–మార్కో రూబియో మధ్య తెరవెనుక రహస్య పోటీ నడుస్తోందని మీడియా సమాచారం.

వాన్స్ ఈ విధంగా వెనక్కి తగ్గడానికి ప్రధాన కారణం అమెరికా జాతీయ నిఘా డైరెక్టర్ తులసి గబ్బార్డ్ క్యాబినెట్ నుంచి వైదొలగడమని చెప్పబడుతోంది. ఆమె నిష్క్రమణతో విదేశీ వ్యవహారాల్లో అనుభవజ్ఞులైన సలహాదారులు తగ్గిపోయారని వర్గాలు అంటున్నాయి.

మరోవైపు, ఇరాన్‌పై యుద్ధ విధానంలో వాన్స్ అధ్యక్షుడు ట్రంప్ నిర్ణయాలను వ్యతిరేకిస్తున్నట్లు వైట్‌హౌస్ వర్గాలు తెలిపాయి. యుద్ధాన్ని త్వరగా ముగించాలని వాన్స్ సూచిస్తున్నట్లు సమాచారం. ఇరాన్ విషయంలో దూకుడు వైఖరి అవలంబిస్తున్న విదేశాంగ మంత్రి మార్కో రూబియోతో ట్రంప్ దగ్గరగా ఉన్నట్లు తెలుస్తోంది.

ఇటీవల ఓ కార్యక్రమంలో వాన్స్, “అందరికీ అణ్వాయుధాలు కావాలనుకుంటే ప్రపంచం మొత్తం ప్రమాదంలో పడుతుంది” అని వ్యాఖ్యానించారు. ఈ వ్యాఖ్యలు విదేశాంగ విధానంపై ఆయన విశ్లేషణాత్మక వైఖరిని సూచిస్తున్నాయి.