Neal Katyal: నీల్ కత్యాల్: ట్రంప్ టారిఫ్‌లకు 'నీల్' బ్రేక్ పెడతాడా..? భారతీయ వంశం లాయర్ ఎవరు?

Neal Katyal: అమెరికా చరిత్రలో అతి ముఖ్యమైన న్యాయపోరాటానికి సుప్రీంకోర్టు సిద్ధపడుతోంది. టారిఫ్‌ల ఆధారంగా ప్రపంచ దేశాలతో వాణిజ్య యుద్ధం చేస్తున్న అధ్యక్షుడు డొనాల్డ్ ట్రంప్ అధికారాలపై బుధవారం (అమెరికా సమయం ప్రకారం) విచారణ జరగనుంది. ఈ కేసులో ట్రంప్ విధానాలకు వ్యతిరేకంగా భారతీయ సంతతి న్యాయవాది నీల్ కత్యాల్ (Neal Katyal) తీవ్ర వాదనలు చేయబోతున్నారు. దీంతో అతని పేరు ప్రపంచ మీడియాల్లో హాట్ టాపిక్‌గా మారింది. ఇంతకీ, ఈ 'నీల్' ఎవరు?

షికాగోలో 54 ఏళ్ల క్రితం జన్మించిన నీల్ కత్యాల్ తల్లిదండ్రులు భారతదేశం నుంచి వలసలు వచ్చినవారు. యేల్ లా స్కూల్‌లో డిగ్రీ పూర్తి చేసిన ఆయన, ఒబామా అధ్యక్షత్వ కాలంలో యూఎస్ సొలిసిటర్ జనరల్‌గా పనిచేశారు. ఇప్పటివరకు అమెరికా సుప్రీంకోర్టులో 50కి అధిక కేసుల్లో వాదించి, తనను తాను నిరూపించుకున్నారు.

ట్రంప్ విధానాలకు ఎదురొడ్డిన నీల్..

గతంలోనూ ట్రంప్ (Donald Trump) నిర్ణయాలకు వ్యతిరేకంగా కొన్ని సందర్భాల్లో నీల్ న్యాయస్థానాల్లో పోరాడారు. 2017లో ట్రంప్ విధించిన ప్రయాణ నిషేధాలకు చెక్ పెట్టే కేసుల్లో ముఖ్య పాత్ర పోషించారు. 'ఇంపీచ్: ది కేస్ అగైనెస్ట్ డొనాల్డ్ ట్రంప్' అనే పుస్తకాన్ని రాసి, ట్రంప్ వ్యతిరేక పోరాటాన్ని మరింత బలపరిచారు. ఇప్పుడు, ట్రంప్ టారిఫ్‌లకు వ్యతిరేకంగా చిన్న వ్యాపారులు, డెమోక్రట్ పాలిత రాష్ట్రాల కూటమి తరపున సుప్రీంకోర్టులో వాదించేందుకు సిద్ధమవుతున్నారు.

రెండోసారి అధికారంలోకి వచ్చిన ట్రంప్, మిత్ర-శత్రువులు అనే తేడా లేకుండా ప్రపంచ దేశాలపై భారీ సుంకాలు (Trump Tariffs) విధించారు. అంతర్జాతీయ అత్యవసర ఆర్థిక అధికార చట్టాన్ని ఉపయోగించి ఈ చర్యలు తీసుకున్నట్లు అమెరికా ప్రభుత్వం చెప్పింది. కానీ, ఈ చట్టాన్ని అమలు చేస్తూ అధ్యక్షుడు ఫెడరల్ చట్టాలను ఉల్లంఘించారనే ఆరోపణలు ఎదుర్కొన్నారు. దీంతో కొన్ని కోర్టులు ట్రంప్ నిర్ణయాలను ఆపేశాయి. ఈ నేపథ్యంలోనే ప్రభుత్వం సుప్రీంకోర్టును సంప్రదించింది. బుధవారం ఈ కేసు విచారణ జరగనుంది.

విచారణకు ట్రంప్ దూరం..

తొలుత ఈ విచారణకు ట్రంప్ స్వయంగా హాజరయ్యేందుకు భావించారు. కానీ, కొన్ని కారణాల వల్ల ఆ ఉద్దేశాన్ని మార్చుకున్నారు. ప్రభుత్వ తరపున ట్రెజరీ సెక్రటరీ స్కాట్ బెసెంట్ హాజరుకానున్నారు. ఈ కేసుపై ట్రంప్ సోషల్ మీడియాలో స్పందిస్తూ, "మేం గెలిస్తే అమెరికా ప్రపంచంలోనే అత్యంత ధనవంతమైన, సురక్షిత దేశంగా మారుతుంది. ఓడిపోతే పేద దేశంగా మిగిలిపోతుంది. అలా జరగకుండా దేవుడిని ప్రార్థిస్తున్నాను" అంటూ పోస్ట్ చేశారు.

ఈ విచారణ ఫలితం అమెరికా వాణిజ్య విధానాలకు, ప్రపంచ ఆర్థిక వ్యవస్థకు కీలకమవుతుందని నిపుణులు అంచనా. నీల్ కత్యాల్ వాదనలు ట్రంప్ టారిఫ్‌లకు ఎలాంటి దెబ్బ తీస్తాయో చూడాలి.