Al-Falah University Chairman Arrested: తప్పుడు గుర్తింపుతో రూ.415 కోట్ల మోసం.. అల్‌-ఫలా యూనివర్సిటీ ఛైర్మన్‌ అరెస్ట్‌
అల్‌-ఫలా యూనివర్సిటీ ఛైర్మన్‌ అరెస్ట్‌
Al-Falah University Chairman Arrested: హరియాణాలోని ఫరీదాబాద్‌ సమీపంలో ఉన్న అల్‌-ఫలా యూనివర్సిటీ (Al Falah University)పై ఎంఫోర్స్‌మెంట్‌ డైరెక్టరేట్‌ (ఈడీ) దాడులు నిర్వహించిన దర్యాప్తులో భారీ మోసం బయటపడింది. తప్పుడు అక్రిడిటేషన్‌, గుర్తింపు ధృవీకరణలతో విద్యార్థుల నుంచి దాదాపు రూ.415.10 కోట్ల ఫీజులు వసూలు చేసినట్లు ఈడీ అధికారులు గుర్తించారు. ఈ ఆదాయాన్ని ఆదాయపు పన్ను రిటర్నుల్లో 'స్వచ్ఛంద విరాళాలు'గా చూపి మనీలాండరింగ్‌కు పాల్పడినట్లు వెల్లడించారు.
మంగళవారం యూనివర్సిటీ ప్రధాన కార్యాలయం, ట్రస్టీల నివాసాల్లో జరిపిన సోదాల్లో రూ.48 లక్షలకుపైగా నగదు, డిజిటల్‌ పరికరాలు, ముఖ్యమైన డాక్యుమెంట్లు స్వాధీనం చేసుకున్నారు. ఈ కేసులో ఆధారంగా యూనివర్సిటీ ఛైర్మన్‌ జావెద్‌ అహ్మద్‌ సిద్దిఖీని అదుపులోకి అరెస్టు చేశారు. ప్రస్తుతం ఆయనను విచారిస్తున్నారు.
దర్యాప్తులో తేలిన విషయాల ప్రకారం.. 2014-15 నుంచి 2024-25 ఆర్థిక సంవత్సరం వరకు ఫీజుల రూపంలో వచ్చిన భారీ ఆదాయాన్ని ఆదాయపు పన్ను రిటర్నుల్లో స్వచ్ఛంద విరాళాలుగా చూపారు. యూనివర్సిటీకి ఎటువంటి చట్టబద్ధ గుర్తింపు లేకపోయినా, తప్పుడు ధృవీకరణ పత్రాలతో విద్యార్థులను మోసం చేసి ఫీజులు వసూలు చేశారు. ఈ అక్రమ నిధులను ఎక్కడికి మళ్లించారు, ఎవరికి లబ్ధి చేకూర్చారు అనే అంశాలపై లోతైన దర్యాప్తు కొనసాగుతోంది.
ఇటీవల ఫరీదాబాద్‌లో పట్టుబడిన ఉగ్ర మాడ్యూల్‌లోని కొందరికి ఈ యూనివర్సిటీతో సంబంధాలు ఉన్నట్లు గుర్తించడంతో ఈ సంస్థ పేరు మరింత ప్రముఖమైంది. ఈ నేపథ్యంలో ఇండియన్‌ యూనివర్సిటీస్‌ అసోసియేషన్‌ (AIU) అల్‌-ఫలా యూనివర్సిటీ సభ్యత్వాన్ని రద్దు చేసింది. దిల్లీ పోలీసులు ఫోర్జరీ, మోసం నేరాల కింద రెండు ప్రత్యేక ఎఫ్‌ఐఆర్‌లు నమోదు చేశారు.
అలాగే నేషనల్‌ అసెస్‌మెంట్‌ అండ్‌ అక్రిడిటేషన్‌ కౌన్సిల్‌ (న్యాక్) కూడా యూనివర్సిటీ వెబ్‌సైట్‌లో తప్పుడు గుర్తింపు సమాచారం ప్రచురించినందుకు షోకాజ్‌ నోటీసు జారీ చేసింది. సోమవారం ఛైర్మన్‌ జావెద్‌కు రెండు సమన్లు పంపిన నేపథ్యంలోనే మంగళవారం దాడులు, అరెస్టు జరిగాయి.
ఈ మోసం వెనక ఉన్న నెట్‌వర్క్‌, నిధుల మళ్లింపు మార్గాలు, ఇతర సంబంధిత వ్యక్తులను గుర్తించేందుకు ఈడీ దర్యాప్తు ముమ్మరం చేసింది. దేశంలో విద్యా వ్యవస్థలో ఇలాంటి మోసాలు తలెత్తడం గంభీర ఆందోళన కలిగిస్తోందని నిఘా వర్గాలు అభిప్రాయపడుతున్నాయి.
