Cash on Delivery Scam: క్యాష్ ఆన్ డెలివరీ స్కామ్: కొత్త షాపింగ్ మోసంపై హెచ్చరిక

Cash on Delivery Scam: ఆన్‌లైన్ షాపింగ్‌లో ‘క్యాష్ ఆన్ డెలివరీ’ (COD) ద్వారా జరుగుతున్న కొత్త మోసంపై డిజిటల్ క్రియేటర్ త్విషా తులి హెచ్చరికలు జారీ చేశారు. ఈ స్కామ్ భారతదేశంలోని అనేక గృహాలను ప్రభావితం చేసే అవకాశం ఉందని, జాగ్రత్తగా ఉండాలని ఆమె తన ఇన్‌స్టాగ్రామ్ రీల్‌లో వివరించారు.

స్కామ్ విధానం:

స్కామర్లు విశ్వసనీయ కొరియర్ సంస్థలైన డెలివరీ, బ్లూ డార్ట్, ఈకామ్ ఎక్స్‌ప్రెస్, షోడోఫాక్స్ వంటి సేవలను ఉపయోగించి నకిలీ పార్సిళ్లను పంపిస్తారు. ఈ పార్సిళ్లలో ఆర్డర్ చేయని వస్తువులు ఉంటాయి. త్విషా తులి తన అనుభవాన్ని పంచుకుంటూ, తమ ఇంటికి ఫేస్‌మాస్క్‌ల పార్సిల్ వచ్చినప్పటికీ, ఎవరూ ఆర్డర్ చేయలేదని గుర్తించి తిరిగి పంపించారని తెలిపారు. మరో సందర్భంలో, ఇంట్లో ఎవరో ఆర్డర్ చేశారని భావించి రూ.7,000 చెల్లించి పార్సిల్ తీసుకున్నారని, కానీ తెరిచి చూస్తే అందులో చైనీస్ పుస్తకం మాత్రమే ఉందని, ఆర్డర్‌తో సంబంధం లేని వస్తువని గుర్తించారని వివరించారు.

స్కామర్ల వ్యూహం:

స్కామర్లు COD ఎక్కువగా ఉపయోగించే వినియోగదారుల డేటాను సేకరిస్తారు. వారు వేర్వేరు పేర్లతో, వేర్వేరు కొరియర్ సంస్థల ద్వారా పార్సిళ్లను పంపిస్తూ డబ్బులు వసూలు చేస్తారు. ఈ మోసాలకు విశ్వసనీయ కొరియర్ కంపెనీలకు సంబంధం లేనప్పటికీ, వాటి పేరును దుర్వినియోగం చేస్తూ మోసగాళ్లు ఈ చర్యలకు పాల్పడుతున్నారని తులి హెచ్చరించారు.

జాగ్రత్తలు:

ఆర్డర్‌ను నిర్ధారించండి: డబ్బులు చెల్లించే ముందు పార్సిల్‌కు సంబంధించిన ఆర్డర్‌ను ఇంట్లోని సభ్యులతో కన్ఫామ్ చేసుకోవాలి.

పేరును గుడ్డిగా నమ్మవద్దు: పార్సిల్‌పై ఇంట్లోని వ్యక్తి పేరు ఉందని నేరుగా చెల్లింపు చేయకూడదు.

అనుమానాస్పద డెలివరీలు: అనుమానాస్పద పార్సిళ్ల గురించి వెంటనే సంబంధిత కొరియర్ కంపెనీకి సమాచారం ఇవ్వాలి.

క్యూఆర్ కోడ్ స్కాన్: పార్సిల్‌పైని క్యూఆర్ కోడ్‌ను స్కాన్ చేయకుండా జాగ్రత్త వహించాలి.

త్విషా తులి ఈ స్కామ్‌ల గురించి ప్రజలను అప్రమత్తం చేస్తూ, ఆన్‌లైన్ షాపింగ్‌లో జాగ్రత్తగా ఉండాలని సూచించారు.