CJP Leaders: జంతర్ మంతర్ కేసుల్లో సీజేపీ నేతలు.. దిల్లీ పోలీసుల ఎదుట హాజరైన సౌరవ్ దాస్, అశుతోష్ రంకా
సౌరవ్ దాస్, అశుతోష్ రంకా
CJP Leaders: కాక్‌రోచ్ జనతా పార్టీ (సీజేపీ) సహ-అధ్యక్షులు సౌరవ్ దాస్, అశుతోష్ రంకా గత అక్టోబర్‌లో జంతర్ మంతర్ నిషేధిత ప్రాంతంలోకి అనధికారంగా ప్రవేశించిన కేసుల్లో గురువారం (నవంబర్ 5) రాజౌరీ గార్డెన్‌లోని దిల్లీ పోలీస్ క్రైమ్ బ్రాంచ్ ముందు హాజరయ్యారు.
విచారణ తర్వాత అశుతోష్ రంకా మీడియాతో మాట్లాడుతూ “ఈరోజు విచారణ అక్టోబర్ 13 సంఘటనలపై సాధారణ దర్యాప్తులో భాగం. ఏ ఏజెన్సీ దర్యాప్తు చేసినా మేం పూర్తి సహకారం అందిస్తాం. జంతర్ మంతర్‌లో గానీ, ఏ ప్రజా రోడ్డుపైన గానీ జాతీయ జెండా ఎగురవేయడం నేరం కాదు. దర్యాప్తు సద్భావనతో జరుగుతుందని మాకు నమ్మకం” అని అన్నారు.
విదేశీ నిధులు అందుతున్నాయన్న ఆరోపణలను సౌరవ్ దాస్ ఖండించారు. “ఈ ఆరోపణలు పూర్తిగా నిరాధారం. జూన్ 6న మా మొదటి నిరసనకు ముందు నుంచే ఈ ఆరోపణలకు ఆధారం చూపాలని అడుగుతున్నాం. జూన్ 3న మా మొదటి ప్రెస్ కాన్ఫరెన్స్ జరిగింది. అప్పటి నుంచి అధికారులను ఆధారాలు చూపమని పదే పదే కోరాం. నాలుగైదు నెలలు గడిచినా ఏ ఆధారం చూపలేదు” అని ఆయన అన్నారు. ఈ ఆరోపణలను ఒక కేంద్ర మంత్రి పదే పదే చెప్పడం దురదృష్టకరమని కూడా ఆయన వ్యాఖ్యానించారు.
గత అక్టోబర్ 13న జంతర్ మంతర్ నిషేధిత ప్రాంతంలోకి ప్రవేశించి 12 మందితో కలిసి జాతీయ జెండా ఎగురవేసినందుకు ఈ ఇద్దరు నేతలను పోలీసులు అరెస్టు చేసి జ్యుడిషియల్ కస్టడీకి పంపించారు. అక్టోబర్ 11న వారు సంతకం చేసిన శాంతి బాండ్‌ను ఉల్లంఘించారని పోలీసులు పేర్కొన్నారు. కన్నాట్ ప్లేస్, పార్లమెంట్ స్ట్రీట్ పోలీస్ స్టేషన్లలో రెండు ఎఫ్‌ఐఆర్‌లు నమోదయ్యాయి. ఆ తర్వాత కేసులను క్రైమ్ బ్రాంచ్‌కు బదిలీ చేశారు.
అక్టోబర్ 21న వ్యక్తిగత బాండ్లు, ₹50,000 చొప్పున స్యూరిటీ బాండ్లు ఇచ్చి తిహార్ జైలు నుంచి విడుదలయ్యారు. జంతర్ మంతర్ కేసు దర్యాప్తు పూర్తయ్యే వరకు బాండ్లు అమలులో ఉంటాయని ప్రత్యేక ఎగ్జిక్యూటివ్ మేజిస్ట్రేట్ ఆదేశించారు. అక్టోబర్ 22న విచారణకు సమన్లు జారీ చేసినా, అదనపు సమయం కోరి గురువారం హాజరయ్యారు.
