Supreme Court of India: మూఢనమ్మకాలపై స్పష్టత – శబరిమల ఆలయంలో మహిళల ప్రవేశం కేసులో సుప్రీం కోర్టు వ్యాఖ్యలు

Supreme Court of India: శబరిమల ఆలయంలో మహిళల ప్రవేశంపై సుప్రీం కోర్టు రాజ్యాంగ ధర్మాసనం రెండో రోజు కూడా కీలక వాదోపవాదాలు జరిగాయి. మత విశ్వాసాలు, ఆచారాలు, మూఢనమ్మకాల మధ్య తేడాను నిర్ణయించే అధికారం న్యాయస్థానానికి ఉందని సుప్రీం కోర్టు స్పష్టం చేసింది. 2018లో మహిళలకు ప్రవేశం కల్పించిన తీర్పును సమీక్షిస్తున్న తొమ్మిది మంది న్యాయమూర్తుల ధర్మాసనం ముందు ఈ వాదనలు సాగాయి.

చీఫ్ జస్టిస్ జస్టిస్ సూర్యకాంత్ నేతృత్వంలోని ఈ ధర్మాసనం మత స్వేచ్ఛకు సంబంధించి ఏడు ముఖ్యమైన ప్రశ్నలను రూపొందించింది. శబరిమలతో పాటు ఇతర ప్రార్థనా స్థలాల్లో మహిళలపై వివక్ష అంశంపై విస్తృత చర్చ జరిగింది.

కేంద్ర ప్రభుత్వం తరఫున సొలిసిటర్ జనరల్ తుషార్ మెహతా వాదనలు వినిపించారు. “ఒక ఆచారం మూఢనమ్మకమా కాదా అని న్యాయస్థానం నిర్ణయించలేదు. అది చట్టసభల పరిధి. రాజ్యాంగ అధికరణం 25(2)(బి) ప్రకారం సంస్కరణలు తీసుకురావాల్సింది శాసనసభలే” అని అన్నారు. న్యాయమూర్తులు చట్టాల్లో నిపుణులే కానీ మత విషయాల్లో కాదని కూడా పేర్కొన్నారు.

ఈ వాదనను జస్టిస్ అహసానుద్దీన్ అమానుల్లా తోసిపుచ్చారు. “ఏది మూఢనమ్మకమో, ఏది కాదో నిర్ణయించే అధికారం న్యాయస్థానానికి ఉంది” అని స్పష్టం చేశారు. మతాచారాల విషయంలో న్యాయస్థానాలు ఎలాంటి నిర్ణయం తీసుకోలేవన్న కేంద్ర వాదనకు ధర్మాసనం ఈ వ్యాఖ్యలు చేసింది.

శబరిమలలో మహిళల ప్రవేశంపై 2018లో ఐదుగురు సభ్యుల ధర్మాసనం చారిత్రాత్మక తీర్పు ఇచ్చి, రుతువ్రతల వయసు మహిళలపై ఉన్న నిషేధాన్ని రద్దు చేసింది. ఆ తీర్పును సమీక్షించాలని దాఖలైన పిటిషన్లపై ఇప్పుడు తొమ్మిది మంది ధర్మాసనం విచారణ చేపట్టింది. ఏప్రిల్ 22 వరకు విచారణ కొనసాగనుంది.

ఈ విచారణలో మత విశ్వాసాలు, రాజ్యాంగ హక్కులు, మహిళల సమానత్వం, ఆలయాల నిర్వహణ సంస్థల అధికారాలు వంటి అంశాలపై లోతైన చర్చ జరుగుతోంది. కేంద్రం మహిళల ప్రవేశ ఆంక్షలను కొనసాగించాలని వాదిస్తుండగా, మరోవైపు సమానత్వ హక్కులు కాపాడాలని వాదనలు వినిపిస్తున్నాయి.

ఈ కేసు దేశవ్యాప్తంగా మత స్వేచ్ఛ, సమానత్వం మధ్య సంబంధాన్ని తిరిగి పరిశీలించే అవకాశం కల్పిస్తోంది. విచారణ ముగిసిన తర్వాత సుప్రీం కోర్టు తీర్పు ఏమిటి అనేది ఆసక్తికరంగా మారింది.