Congress: అమిత్‌ షా వ్యాఖ్యలకు కాంగ్రెస్‌ కౌంటర్‌.. హోంమంత్రి పదవికి రాజీనామా చేసి బీజేపీకి తిరిగిరావాలని సవాల్‌
బీజేపీకి తిరిగిరావాలని సవాల్‌
Congress: ఇండియా కూటమి నవంబర్‌ 1 ర్యాలీని ‘ఘుస్పేతియా బచావో’ (చొరబాటుదారులను రక్షించే) కార్యక్రమంగా అభివర్ణించిన కేంద్ర హోంమంత్రి అమిత్‌ షా వ్యాఖ్యలపై కాంగ్రెస్‌ తీవ్రంగా స్పందించింది. హోంమంత్రి బాధ్యతలు నిర్వర్తించలేకపోతే ఆ పదవిని వదిలేసి బీజేపీ అధ్యక్ష పదవికి తిరిగి రావాలని కాంగ్రెస్‌ సీనియర్‌ నేత పవన్‌ ఖేరా సూచించారు.
గురువారం ఎక్స్‌ (ట్విట్టర్‌)లో పోస్ట్‌ చేస్తూ పవన్‌ ఖేరా మాట్లాడుతూ.. “మోటా భాయ్‌.. హోం మంత్రిత్వ శాఖ మీ నియంత్రణలో లేకపోతే ఆ కుర్చీని ఎందుకు పట్టుకుని ఉన్నారు? ఏడేళ్లలో దేశంలోని మూడు కోట్ల ఘుస్పేతియాలను నిర్వహించలేకపోయారు” అని వ్యాఖ్యానించారు. మణిపూర్‌లో కొనసాగుతున్న హింస, పహల్గామ్‌ ఉగ్రదాడి, 2025లో రెడ్‌ ఫోర్ట్‌ సమీపంలో జరిగిన బ్లాస్ట్‌, జాతీయ రాజధాని సమీపంలో 300 కిలోల ఆర్‌డీఎక్స్‌ స్వాధీనం వంటి అంశాలను ఉదహరిస్తూ అంతర్గత భద్రతా వ్యవహారాల్లో షా వైఫల్యాన్ని ప్రశ్నించారు.
షా బీజేపీ బాధ్యతలు చేపట్టి హైదరాబాద్‌ నుంచి హర్యానా (కర్నాల్‌) వరకు పార్టీ ‘మొబైల్‌ సర్కస్‌’తో తిరగాలని కూడా సూచించారు. బీజేపీ అధ్యక్షుడు నితిన్‌ నాబిన్‌పైనా సూటిగా వ్యాఖ్యానిస్తూ “పాపం నితిన్‌ నాబిన్‌కి ఏమీ అర్థం కావడం లేదు. అతన్ని విడుదల చేయండి” అన్నారు. దేశ నౌకను ముంచేస్తూ హోం మంత్రిత్వ శాఖను ఎందుకు పట్టుకుని ఉన్నారని ప్రశ్నించారు.
ఇక బీజేపీ నిర్వహించిన ‘లోక్తంత్ర బచావో, అరాజకత హటావో’ మార్చ్‌ తర్వాత కర్నాల్‌లో ర్యాలీలో మాట్లాడిన అమిత్‌ షా.. నవంబర్‌ 1 ర్యాలీని ఓటర్ల రక్షణ కోసం కాకుండా చొరబాటుదారులను రక్షించేందుకే ఏర్పాటు చేశారని ఆరోపించారు. చొరబాటుదారులను గుర్తించి, ఎలక్టోరల్‌ రోల్స్‌ నుంచి తొలగించి, దేశం నుంచి బహిష్కరించాలన్నదే బీజేపీ విధానమని ‘డిటెక్ట్‌, డిలీట్‌ అండ్‌ డిపోర్ట్‌’ అని స్పష్టం చేశారు.
పార్లమెంట్‌ను నడపనీయకుండా, అంశాలపై చర్చించకుండా రచ్చ, బహిష్కరణలను కాంగ్రెస్‌ సంస్కృతిగా మార్చేశారని రాహుల్‌ గాంధీపైనా షా విమర్శలు గుప్పించారు. పార్లమెంట్‌ దేశంలోని సుప్రీం డెమోక్రటిక్‌ వేదిక అని, అయినా ప్రతిపక్ష నేత దాన్ని నడపనీయడం లేదని ఆయన అన్నారు.
కాంగ్రెస్‌ మీడియా, ప్రచార విభాగం అధ్యక్షుడు, రాజ్యసభ సభ్యుడు పవన్‌ ఖేరా ఈ వ్యాఖ్యలు చేశారు.
