Removing Obscene Content on X: అశ్లీల కంటెంట్ తొలగింపుపై ఎక్స్కు గడువు పొడిగింపు: కేంద్రం నిర్ణయం
ఎక్స్కు గడువు పొడిగింపు: కేంద్రం నిర్ణయం
Removing Obscene Content on X: కృత్రిమ మేధ (ఏఐ) సాధనాల సాయంతో సృష్టించిన అసభ్యకరమైన లైంగిక చిత్రాలు, వీడియోలు మరియు పోస్టులను తొలగించేందుకు సోషల్ మీడియా ప్లాట్ఫామ్లకు కేంద్ర ప్రభుత్వం ఇచ్చిన ఆదేశాలకు సంబంధించి, ఎక్స్ (గతంలో ట్విట్టర్) వేదికకు నివేదిక సమర్పించే గడువును మరోసారి పొడిగించింది. బుధవారం (జనవరి 8) వరకు ఈ గడువు నిర్ణయించారు.
ఇటీవల కేంద్రం జారీ చేసిన ఆదేశాల మేరకు, 'గ్రోక్' వంటి ఏఐ టూల్స్ ఉపయోగించి రూపొందించిన చట్టవిరుద్ధమైన అశ్లీల కంటెంట్ను వెంటనే తొలగించాలని సోషల్ మీడియా సంస్థలకు సూచించింది. ఈ చర్యలపై వివరణాత్మక యాక్షన్ టేకన్ రిపోర్టు (ఏటీఆర్) సమర్పించాల్సి ఉంది. అయితే, మరింత సమయం కావాలని ఎలాన్ మస్క్కు చెందిన ఎక్స్ సంస్థ అభ్యర్థన మేరకు కేంద్రం ఈ పొడిగింపు మంజూరు చేసిందని అధికార వర్గాలు వెల్లడించాయి.
ఎక్స్ సంస్థ తమ 'సేఫ్టీ' హ్యాండిల్ ద్వారా చట్టవిరుద్ధ కంటెంట్పై కఠిన చర్యలు తీసుకుంటామని ఇప్పటికే ప్రకటించింది. ముఖ్యంగా బాలలపై లైంగిక దురాగతాలను చూపించే చిత్రాలు, వీడియోలను తొలగించడంతోపాటు, అలాంటి కంటెంట్ ప్రచారం చేసిన ఖాతాలను శాశ్వతంగా బ్లాక్ చేస్తామని స్పష్టం చేసింది.
అదనంగా, 'గ్రోక్' వంటి ఏఐ సాధనాలతో చట్టవిరుద్ధ పోస్టులు సృష్టించే వారిని కూడా నేరుగా అప్లోడ్ చేసినవారితో సమానంగా బాధ్యులుగా పరిగణించి చర్యలు తీసుకుంటామని ఎక్స్ హామీ ఇచ్చింది. ఈ నేపథ్యంలో కేంద్రం నిరంతరం సోషల్ మీడియా ప్లాట్ఫామ్లపై ఒత్తిడి పెంచుతోంది.
