Aviation Minister Ram Mohan Naidu: మహారాష్ట్రకి తీరని నష్టం.. అజిత్ పవార్ మరణంపై విమానయాన మంత్రి రామ్మోహన్ నాయుడు
అజిత్ పవార్ మరణంపై విమానయాన మంత్రి రామ్మోహన్ నాయుడు
Aviation Minister Ram Mohan Naidu: మహారాష్ట్ర ఉప ముఖ్యమంత్రి అజిత్ పవార్ ప్రయాణిస్తున్న విమానం బారామతి విమానాశ్రయంలో కూలిపోయిన దుర్ఘటన మహారాష్ట్రానికి తీరని నష్టం కలిగించిందని పౌర విమానయాన శాఖ మంత్రి కె. రామ్మోహన్ నాయుడు వ్యాఖ్యానించారు. ఈ ప్రమాదంలో అజిత్ పవార్తో పాటు విమానంలోని మరో నలుగురు ప్రాణాలు కోల్పోయారు.
ప్రాథమిక వివరాల ప్రకారం, బారామతి ఎయిర్పోర్టులో దృశ్యమానత (విజిబిలిటీ) చాలా తక్కువగా ఉందని తేలిందని మంత్రి తెలిపారు. ల్యాండింగ్ సమయంలో రన్వే కనిపిస్తుందా? అని బారామతి ఎయిర్ ట్రాఫిక్ కంట్రోల్ (ఏటీసీ) అధికారులు పైలట్లను అడిగారు. రన్వే కనిపించడం లేదని పైలట్లు సమాధానం ఇచ్చారని, దీంతో విమానం గాల్లో కొంతసేపు చక్కర్లు (గో-అరౌండ్) కొట్టిందని రామ్మోహన్ నాయుడు వివరించారు.
రెండోసారి ల్యాండింగ్ ప్రయత్నంలో రన్వే కనిపిస్తుందని పైలట్లు సానుకూలంగా స్పందించడంతో ఏటీసీ క్లియరెన్స్ ఇచ్చింది. అయితే, ఆ వెంటనే విమానం కూలిపోయిందని మంత్రి తెలిపారు. ఈ ఘటనపై మరిన్ని వివరాలు సేకరిస్తున్నామని, పారదర్శకంగా పూర్తి స్థాయి దర్యాప్తు చేపడతామని ఆయన హామీ ఇచ్చారు. ఇప్పటికే డైరెక్టరేట్ జనరల్ ఆఫ్ సివిల్ ఏవియేషన్ (డీజీసీఏ), ఎయిర్క్రాఫ్ట్ యాక్సిడెంట్ ఇన్వెస్టిగేషన్ బ్యూరో (ఏఏఐబీ) బృందాలు పుణె చేరుకున్నాయని వెల్లడించారు.
అదే విధంగా డీజీసీఏ వర్గాలు ల్యాండింగ్ సమయంలో రన్వే గుర్తించడంలో పైలట్లకు ఇబ్బందులు ఎదురైనట్లు తెలిపాయి. అయితే, పైలట్ల నుంచి ఆపద సంకేతం (మేడే కాల్) రాలేదని స్పష్టం చేశాయి.
ఈ దుర్ఘటన మహారాష్ట్ర రాజకీయాల్లో తీరని శూన్యతను కలిగించింది. అజిత్ పవార్ మరణంపై దేశవ్యాప్తంగా దిగ్భ్రాంతి, దిగ్గంతాలు వ్యక్తమవుతున్నాయి. మహారాష్ట్ర ప్రభుత్వం మూడు రోజుల రాష్ట్రీయ శోకాన్ని ప్రకటించింది.
