US Envoy Sergio Gore’s Key Remarks: భారత్‌కంటే ముఖ్యమైన భాగస్వామి మరొకటి లేదు: అమెరికా రాయబారి సెర్గియో గోర్ కీలక వ్యాఖ్యలు

US Envoy Sergio Gore’s Key Remarks: అమెరికాకు భారత్ కంటే మరింత అవసరమైన దేశం మరొకటి లేదని అమెరికా రాయబారి సెర్గియో గోర్ స్పష్టం చేశారు. భారత్‌లో అమెరికా రాయబారిగా సోమవారం (జనవరి 12, 2026) అధికారికంగా బాధ్యతలు స్వీకరించిన సందర్భంగా ఆయన ఈ వ్యాఖ్యలు చేశారు.

ఇరు దేశాల మధ్య ద్వైపాక్షిక, వాణిజ్య సంబంధాలను మరింత బలోపేతం చేసేందుకు పూర్తి కృషి చేస్తానని గోర్ తెలిపారు. అమెరికా అధ్యక్షుడు డొనాల్డ్ ట్రంప్, భారత ప్రధాని నరేంద్ర మోదీ మధ్య ఉన్న స్నేహబంధం నిజమైనదని, అది ప్రపంచవ్యాప్తంగా తాను పర్యటించిన అనుభవంతో చెప్పగలనని ఆయన ఉద్ఘాటించారు.

వాణిజ్యం కీలకం.. త్వరలో ఒప్పందం

"భారత్ ప్రపంచంలో అతిపెద్ద దేశం. ఇరు దేశాల సత్సంబంధాలకు వాణిజ్యం చాలా ముఖ్యమైనది. వీలైనంత త్వరగా వాణిజ్య ఒప్పందం కుదుర్చుకునేందుకు రెండు దేశాల ప్రతినిధులు నిరంతరం చర్చలు జరుపుతున్నారు. భద్రత, సాంకేతికత, ఆరోగ్యం, ఇంధనం వంటి రంగాల్లోనూ సహకారం కొనసాగుతుంది. మాకు భారత్ తర్వాతే ఎవరైనా.. భారత్ కంటే మరింత అవసరమైన భాగస్వామి లేదు" అని సెర్గియో గోర్ పేర్కొన్నారు.

వాణిజ్య ఒప్పందంపై జనవరి 13న భారత్-అమెరికా ప్రతినిధులు మరోసారి సమావేశమవుతారని ఆయన వెల్లడించారు. ఈ సంబంధాలను మరింత ఎత్తుకు తీసుకెళ్లడమే తన లక్ష్యమని, అభివృద్ధి చేసేందుకు పూర్తి ప్రయత్నం చేస్తానని గోర్ చెప్పారు.

ట్రంప్-మోదీ స్నేహం నిజమైనది

ట్రంప్-మోదీ స్నేహబంధం గురించి మాట్లాడుతూ, "నిజమైన స్నేహితుల మధ్య విభేదాలు సహజమే. వాటిని పరిష్కరించుకుని ముందుకు సాగడమే వారి ప్రయత్నం" అని ఆయన అన్నారు. వచ్చే ఏడాది లేదా రెండేళ్లలో అధ్యక్షుడు ట్రంప్ భారత్‌కు పర్యటించే అవకాశం ఉందని సూచించారు.

ప్యాక్స్ సిలికా కూటమిలో భారత్ ఆహ్వానం

సిలికాన్, సెమీకండక్టర్ సరఫరా గొలుసును బలోపేతం చేసేందుకు అమెరికా నేతృత్వంలో ఏర్పడిన 'ప్యాక్స్ సిలికా' కూటమిలోకి భారత్‌ను ఆహ్వానిస్తున్నట్లు రాయబారి గోర్ ప్రకటించారు. ఈ కూటమిలో ఇప్పటికే జపాన్, దక్షిణ కొరియా, బ్రిటన్, ఇజ్రాయెల్ వంటి దేశాలు చేరాయని, భారత్ చేరికతో ఇది మరింత బలపడుతుందని ఆయన తెలిపారు.

ఈ వ్యాఖ్యలు ఇరు దేశాల మధ్య ఉన్న వ్యూహాత్మక భాగస్వామ్యాన్ని మరింత బలపరిచేలా ఉన్నాయి. వాణిజ్య, భద్రతా రంగాల్లో సహకారం పెంచుకునే దిశగా ఇది ముఖ్యమైన అడుగుగా చెప్పవచ్చు.