CBIC Chairman: పెట్రోల్, డీజిల్‌ను జీఎస్టీ పరిధిలోకి తెచ్చే అవకాశం లేదు: సీబీఐసీ ఛైర్మన్

CBIC Chairman: దేశవ్యాప్తంగా పెట్రోల్, డీజిల్‌లపై జీఎస్టీ (గూడ్స్ అండ్ సర్వీసెస్ ట్యాక్స్) విధించాలనే చర్చ చాలాకాలంగా జరుగుతోంది. వినియోగదారులపై ఆర్థిక భారం తగ్గుతుందనే ఆశతో ప్రజలు, అధికారులు ఈ అంశంపై ఆసక్తి చూపుతున్నారు. ఈ నేపథ్యంలో సెంట్రల్ బోర్డ్ ఆఫ్ ఇన్‌డైరెక్ట్ ట్యాక్సెస్ అండ్ కస్టమ్స్ (సీబీఐసీ) ఛైర్మన్ సంజయ్ కుమార్ అగర్వాల్ తాజాగా ఈ విషయంపై స్పష్టత ఇచ్చారు.

సంజయ్ కుమార్ అగర్వాల్ మాట్లాడుతూ, పెట్రోల్, డీజిల్‌పై ప్రస్తుతం సెంట్రల్ ఎక్సైజ్ డ్యూటీ మరియు వ్యాల్యూ యాడెడ్ ట్యాక్స్ (వ్యాట్) విధిస్తున్నారని, ఈ పన్నులు కేంద్ర, రాష్ట్ర ప్రభుత్వాలకు భారీ ఆదాయాన్ని తెచ్చిపెడుతున్నాయని తెలిపారు. ఈ కారణంగా, ప్రస్తుత పరిస్థితుల్లో ఈ ఇంధనాలను జీఎస్టీ పరిధిలోకి తీసుకొచ్చే అవకాశం లేదని స్పష్టం చేశారు.

కేంద్ర ఆర్థిక మంత్రి నిర్మలా సీతారామన్ ఈ అంశంపై గతంలో మాట్లాడుతూ, చట్టపరంగా పెట్రోల్, డీజిల్‌ను జీఎస్టీలో చేర్చేందుకు కేంద్రం సిద్ధంగా ఉందని, కానీ రాష్ట్ర ప్రభుత్వాలు కూడా ఈ నిర్ణయానికి అంగీకరించాలని పేర్కొన్నారు. రాష్ట్రాలు సమ్మతిస్తే, జీఎస్టీ కౌన్సిల్‌లో ట్యాక్స్ రేట్లపై చర్చించి చట్టం రూపొందించవచ్చని ఆమె సూచించారు.

2017లో జీఎస్టీ అమలులోకి వచ్చినప్పటి నుంచి పెట్రోల్, డీజిల్, మద్యం వంటి ఉత్పత్తులను దీని పరిధిలోకి తీసుకొచ్చే అవకాశం లేదని అధికారులు చెబుతున్నారు. ఎందుకంటే, ఈ ఉత్పత్తులపై విధించే ఎక్సైజ్ డ్యూటీ, వ్యాట్ ద్వారా కేంద్ర, రాష్ట్ర ప్రభుత్వాలకు గణనీయమైన ఆదాయం లభిస్తోంది. కొన్ని రాష్ట్రాలకు ఈ పన్నులు వారి మొత్తం ట్యాక్స్ ఆదాయంలో 25-30% వరకు ఉంటాయి. ఈ ఆదాయాన్ని వదులుకోవడానికి రాష్ట్రాలు ఇష్టపడటం లేదు. అంతేకాక, ఈ పన్నుల ద్వారా ధరలను నియంత్రించడం, వినియోగాన్ని ప్రభావితం చేయడం వంటి అధికారం కూడా రాష్ట్రాల వద్ద ఉంటుంది.