Parliamentary Committee: ఎంపీల అభివృద్ధి నిధి పెంపు.. పార్లమెంటరీ కమిటీ అధ్యయనానికి ఎంపిక

Parliamentary Committee: ఎంపీల స్థానిక ప్రాంత అభివృద్ధి పథకం (ఎంపీల్యాడ్స్) కింద కేటాయింపులను పెంచాలనే అంశం సహా ఆరు అంశాలను వివరంగా పరిశీలించాలని పార్లమెంటరీ కమిటీ నిర్ణయించింది. ఎంపీల్యాడ్స్ నిధుల విడుదలకు సంబంధించిన మార్గదర్శకాలు, అభివృద్ధి పనుల సకాలంలో అమలు, నిధుల పంపిణీలో సాంకేతిక సమస్యలు వంటి అంశాలపై కమిటీ అధ్యయనం చేయనుంది.

వికసిత్ భారత్-గ్యారంటీ ఫర్ రోజ్‌గార్ అండ్ అజీవికా మిషన్ (గ్రామీణ్) పథకంతో ఎంపీల్యాడ్స్‌ను సమన్వయం చేసే అవకాశాలపై కూడా కమిటీ పరిశీలన చేయనుంది. గత అక్టోబర్ 5న జరిగిన సమావేశంలో 2026-27 సంవత్సరానికి ఈ అంశాలను ఎంపిక చేసినట్లు లోక్‌సభ బులెటిన్‌లో పేర్కొన్నారు.

కాంగ్రెస్ ఎంపీ కె. సురేష్ నేతృత్వంలోని ఈ కమిటీ ఎంపీల్యాడ్స్ నిధుల పెంపు అవసరాన్ని అంచనా వేయనుంది.పనుల సకాల పర్యవేక్షణ, అమలు, సౌకర్య కేంద్రాల పనితీరు, ఈ-సాక్షి పోర్టల్ ద్వారా నిధుల విడుదలలో ఎదురవుతున్న సాంకేతిక అడ్డంకులపై కూడా దృష్టి సారించనుంది. పథకానికి సంబంధించిన నిధులు, అమలు, పర్యవేక్షణ, సాంకేతిక సవాళ్లు వంటి అంశాలన్నీ ఈ అధ్యయన పరిధిలోకి వస్తాయి.

ప్రస్తుతం ప్రతి ఎంపీకి సంవత్సరానికి రూ.5 కోట్లు కేటాయిస్తున్నారు. 2011-12 నుంచి ఈ మొత్తం మారలేదు. లోక్‌సభ, రాజ్యసభ సభ్యులు దీన్ని రూ.18 నుంచి 20 కోట్లకు పెంచాలని డిమాండ్ చేస్తున్నారు. అయితే ప్రభుత్వం ఇంకా ఈ విషయంపై స్పష్టమైన నిర్ణయం తీసుకోలేదు.