Sonia Gandhi: సోనియా గాంధీ ఆత్మకథపై వివాదం.. భాజపా ప్రశ్నలు, కాంగ్రెస్ ఆరోపణలు

Sonia Gandhi: కాంగ్రెస్ పార్టీ అగ్రనేత సోనియా గాంధీ రాసిన ఆత్మకథ ‘బిలాంగింగ్: ఎ జర్నీ ఆఫ్ లవ్’ పుస్తకాన్ని భారత్‌లో ప్రచురించడం లేదని పెంగ్విన్ సంస్థ ప్రకటించడం రాజకీయంగా వివాదాస్పదమైంది.

ప్రచురణ సంస్థ మోదీ ప్రభుత్వ ఒత్తిడికి లొంగిపోయిందని కాంగ్రెస్ ఆరోపించగా, పుస్తకంలోని కంటెంట్‌పై భాజపా ప్రశ్నలు లేవనెత్తింది. “సోనియా గాంధీ రాసిన పుస్తకం ఆత్మకథనా లేక కల్పితగాథనా అనేది రచయిత్రి, ప్రచురణకర్త తేల్చుకోవాల్సిన విషయం. ఆత్మకథగా పేర్కొన్న పుస్తకం కల్పిత కథ అయితే ప్రచురించడానికి ముందు పబ్లిషర్ దానిని తప్పక పరిశీలిస్తారు. ఆత్మకథ పేరిట రాజకీయం చేయాలని చూస్తే కచ్చితంగా ప్రశ్నలు వస్తాయి” అని భాజపా కౌంటర్ ఇచ్చింది.

పెంగ్విన్ సంస్థ మాత్రం ఎడిటోరియల్ మార్పులకు రచయిత్రి తిరస్కరించినందునే ప్రచురించకూడదని నిర్ణయించుకున్నామని వచ్చిన వార్తలు అవాస్తవమని వెల్లడించింది. ప్రచురణకు ఆసక్తిగానే ఉన్నా సమాచార వాస్తవ నిర్ధారణకు సూచనలు చేయడం తమ హక్కని పేర్కొంది.

మోదీ ప్రభుత్వ హయాంలో భారత భూభాగాలను చైనా ఆక్రమించడం, ఆరెస్సెస్ తదితర అంశాలపై మార్పులు చేయడానికి సోనియా అంగీకరించకపోవడంతోనే పుస్తక ప్రచురణకు పెంగ్విన్ వెనకడుగు వేసిందని కాంగ్రెస్ ఆరోపిస్తోంది. ఈ వివాదం రాజకీయ వర్గాల్లో తీవ్ర చర్చనీయాంశంగా మారింది.