Supreme Court Responds to Sonam Wangchuk’s Arrest: సోనమ్ వాంగ్‌చుక్ అరెస్టు పై సుప్రీంకోర్టు స్పందన: కేంద్రానికి నోటీసులు, ఆమెకు సమాచారం ఎందుకు ఇవ్వలేదని ప్రశ్న

Supreme Court Responds to Sonam Wangchuk’s Arrest: లద్దాఖ్ ఉద్యమ నేత సోనమ్ వాంగ్‌చుక్‌ను జాతీయ భద్రతా చట్టం (NSA) కింద అరెస్టు చేయడాన్ని సవాల్ చేస్తూ ఆయన భార్య గీతాంజలి జె.అంగ్మో దాఖలు చేసిన పిటిషన్‌పై సుప్రీంకోర్టు సోమవారం విచారణ జరిపింది. ఈ పిటిషన్‌ను మంగళవారానికి వాయిదా వేసిన న్యాయస్థానం, కేంద్ర ప్రభుత్వం, జమ్మూకశ్మీర్ అధికారులు, రాజస్థాన్ ప్రభుత్వానికి నోటీసులు జారీ చేసింది. సోనమ్ వాంగ్‌చుక్‌ను ఎన్‌ఎస్‌ఏ కింద నిర్బంధించే ముందు ఆయన భార్యకు ముందస్తు నోటీసు ఎందుకు ఇవ్వలేదని కోర్టు కేంద్రాన్ని ప్రశ్నించింది.

గీతాంజలి తన పిటిషన్‌లో, సోనమ్ వాంగ్‌చుక్‌ను ఎన్‌ఎస్‌ఏ చట్టం కింద అరెస్టు చేయడం అన్యాయమని, ఆయనను వెంటనే విడుదల చేయాలని కోరారు. రాజస్థాన్‌లోని జోధ్‌పుర్ జైలులో ఆయనను విచారణ లేకుండా నిర్బంధించారని, ఆయనను కోర్టు ఎదుట హాజరుపరచాలని ఆమె డిమాండ్ చేశారు. అలాగే, తన భర్తతో నేరుగా లేదా టెలిఫోన్ ద్వారా మాట్లాడే అవకాశం కల్పించాలని విజ్ఞప్తి చేశారు. "సెప్టెంబర్ 26 నుంచి నా భర్తను అరెస్టు చేసినప్పటి నుంచి ఆయనతో మాట్లాడే అవకాశం ఇవ్వలేదు, కలిసేందుకు కూడా అనుమతించలేదు" అని ఆమె ఆవేదన వ్యక్తం చేశారు.

గీతాంజలి తన పిటిషన్‌లో ఉద్యమ స్ఫూర్తిని అణచివేసేందుకు కొంతకాలంగా కుట్రలు జరుగుతున్నాయని ఆరోపించారు. సోనమ్ వాంగ్‌చుక్‌కు పాకిస్థాన్‌తో ఎలాంటి సంబంధాలు లేవని, ఆయన అరెస్టుకు గల కారణాలను స్పష్టంగా తెలియజేయాలని కోరారు. ఇంతకుముందు ఆమె రాష్ట్రపతి ద్రౌపదీ ముర్ము, ప్రధాని నరేంద్ర మోదీ, కేంద్ర హోం మంత్రి అమిత్ షాలకు లేఖలు రాసి వాంగ్‌చుక్ విడుదల కోసం విజ్ఞప్తి చేశారు.

లద్దాఖ్‌లో ఆరవ షెడ్యూల్, పర్యావరణ పరిరక్షణ, స్థానిక హక్కుల కోసం సోనమ్ వాంగ్‌చుక్ నాయకత్వంలో జరుగుతున్న ఉద్యమం గత కొన్నేళ్లుగా ఊపందుకుంది. ఈ ఉద్యమం కారణంగా ఆయన అరెస్టు రాజకీయంగా ప్రేరేపితమైనదని ఆమె ఆరోపించారు. సుప్రీంకోర్టు తదుపరి విచారణలో ఈ అంశంపై స్పష్టత వచ్చే అవకాశం ఉంది.