Supreme Court: సుప్రీం కోర్టు కేంద్రానికి అల్టిమేటం: 4 వారాల్లోగా గ్యాలెంట్రీ అవార్డు ప్రకటించాలి లేదంటే మేమే ఇస్తాం!

Supreme Court: విధి నిర్వహణలో భాగంగా రెండు దశాబ్దాల క్రితం తన ప్రాణాలను పణంగా పెట్టి ఇద్దరు బందిపోట్లను హతమార్చిన మాజీ పోలీస్ అధికారి వివేక్ సింగ్ చౌహాన్‌కు రాష్ట్రపతి గ్యాలెంట్రీ మెడల్ ప్రదానం చేయకపోవడంతో ఏర్పడిన వివాదంపై సుప్రీం కోర్టు కీలక అల్టిమేటం ఇచ్చింది.

సోమవారం జస్టిస్ విక్రమ్‌నాథ్, జస్టిస్ సందీప్ మెహతా, జస్టిస్ ఆర్. మహదేవన్ ధర్మాసనం ఈ వ్యవహారంపై విచారణ చేపట్టింది. 2024 డిసెంబర్ 9న మధ్యప్రదేశ్ హైకోర్టు ఆదేశించినప్పటికీ కేంద్రం అవార్డు ప్రకటించకపోవడంతో కోర్టు ధిక్కరణ కేసు నమోదైంది. కేంద్ర హోం శాఖ కార్యదర్శి దాఖలు చేసిన రివ్యూ పిటిషన్‌పై విచారణలో కోర్టు తీవ్ర అసంతృప్తి వ్యక్తం చేసింది.

కోర్టు స్పష్టమైన హెచ్చరిక: హైకోర్టు ఆదేశాన్ని ఈ నెల 29వ తేదీలోగా అమలు చేయాలని కేంద్రానికి సూచించింది. అంటే, నాలుగు వారాల్లోగా అవార్డు ప్రకటించాలి. లేదంటే ఆగస్టు 15న స్వయంగా కోర్టే అవార్డు ప్రకటిస్తుందని హెచ్చరించింది. ఆ తర్వాత ఎలాంటి గడువు ఇవ్వబోమని కూడా స్పష్టం చేసింది. దీర్ఘకాలంగా న్యాయం కోసం ఎదురు చూస్తున్న మాజీ అధికారికి త్వరగా న్యాయం అందించాలని కోర్టు ఒత్తిడి చేసింది.

ఈ తీర్పు పోలీసు సేవలో ఉన్న అధికారులకు మరియు గ్యాలెంట్రీ అవార్డుల ప్రక్రియను సకాలంలో పూర్తి చేయాల్సిన కేంద్ర ప్రభుత్వానికి బలమైన సందేశం అందిస్తోంది.