Supreme Court’s Major Jolt: సుప్రీంకోర్టు ఝలక్‌.. ట్రైబ్యునళ్ల సంస్కరణల చట్టంలో కీలక నిబంధనలు రద్దు

Supreme Court’s Major Jolt: ట్రైబ్యునళ్ల సంస్కరణల (హేతుబద్ధీకరణ మరియు సర్వీసు నిబంధనల) చట్టం-2021లోని ముఖ్యమైన నిబంధనలను సుప్రీంకోర్టు బుధవారం రద్దు చేసింది. నియామకాలు, సర్వీసు షరతులు, పదవీకాలం వంటి అంశాలకు సంబంధించిన నియమాలు గతంలోనే రద్దు చేసినవేనని, స్వల్ప మార్పులతో కేంద్రం మళ్లీ తెచ్చిందని ధర్మాసనం ధ్వజమెత్తింది. ఇలాంటి నిబంధనలు న్యాయవ్యవస్థ స్వతంత్రాన్ని, అధికార వికేంద్రీకరణ సూత్రాలను దెబ్బతీస్తాయని స్పష్టం చేసింది.

సీజేఐ జస్టిస్‌ బి.ఆర్‌.గవాయ్‌ నేతృత్వంలోని ధర్మాసనం వెలువరించిన తీర్పులో, ‘‘మేము ఈ చట్టానికి సంబంధించి ఆర్డినెన్స్‌ను, 2021 చట్టాన్ని పరిశీలించాం. గతంలో సుప్రీంకోర్టు రద్దు చేసిన నిబంధనలను చిన్నచిన్న మార్పులతో మళ్లీ అమల్లోకి తెచ్చారు. ఇది రాజ్యాంగ విరుద్ధమే’’ అని పేర్కొంది. ఈ నిబంధనలు మళ్లీ ప్రవేశపెట్టాల్సిన అవసరం లేదని, అవి న్యాయవ్యవస్థ స్వాతంత్ర్యాన్ని దెబ్బతీస్తాయని ధర్మాసనం వ్యాఖ్యానించింది.

ట్రైబ్యునళ్ల సభ్యుల పదవీకాలానికి సంబంధించి గతంలో ఇచ్చిన తమ ఆదేశాలను సుప్రీంకోర్టు మరోసారి పునరుద్ఘాటించింది. ఆదాయపు పన్ను అప్పిలేట్‌ ట్రైబ్యునల్‌ (ITAT), కస్టమ్స్‌, ఎక్సైజ్‌ అండ్‌ సర్వీస్‌ ట్యాక్స్‌ అప్పిలేట్‌ ట్రైబ్యునల్‌ (CESTAT) సభ్యులు 62 ఏళ్ల వరకు పదవిలో కొనసాగవచ్చని స్పష్టం చేసింది. అలాగే, వివిధ ట్రైబ్యునళ్ల ఛైర్‌పర్సన్‌లు/అధ్యక్షుల రిటైర్మెంట్‌ వయసును 65 ఏళ్లుగా నిర్ధారించింది.

2021లో కేంద్రం తీసుకొచ్చిన ట్రైబ్యునళ్ల సంస్కరణల చట్టంతో ఫిల్మ్‌ సర్టిఫికేషన్‌ అప్పిలేట్‌ ట్రైబ్యునల్‌ సహా పలు అప్పిలేట్‌ సంస్థలు రద్దయ్యాయి. జుడీషియల్‌, అడ్మినిస్ట్రేటివ్‌ సభ్యుల నియామక నియమాల్లో కూడా పలు సవరణలు జరిగాయి. ఈ మార్పులు న్యాయవ్యవస్థ స్వతంత్రాన్ని దెబ్బతీస్తాయని ఆరోపిస్తూ మద్రాస్‌ బార్‌ అసోసియేషన్‌తో పాటు పలువురు సుప్రీంకోర్టులో పిటిషన్లు దాఖలు చేశారు. దీనిపై గతంలో విచారణ జరిపిన ధర్మాసనం తీర్పును రిజర్వ్‌లో పెట్టగా, బుధవారం ఈ కీలక తీర్పు వెలువరించింది.

న్యాయవ్యవస్థ స్వతంత్రం, విభజన ఆఫ్‌ పవర్స్‌ సూత్రాలకు అనుగుణంగా ట్రైబ్యునళ్లు పనిచేయాలని సుప్రీంకోర్టు మరోసారి స్పష్టం చేసింది. కేంద్రం ఈ తీర్పును దృష్టిలో ఉంచుకొని భవిష్యత్తులో చట్ట సవరణలు చేపట్టాల్సి ఉంటుంది.