విమాన ప్రమాదంపై కేంద్రమంత్రి రామ్మోహన్‌ నాయుడు భావోద్వేగం

కేంద్ర పౌర విమానయాన శాఖ మంత్రి రామ్మోహన్‌ నాయుడు భావోద్వేగానికి గురయ్యారు. తన తండ్రి ఎర్రన్నాయుడుని గుర్తు చేసుకున్నారు. "నా తండ్రి కూడా ఇలాంటి ప్రమాదంలోనే మరణించారు. అహ్మదాబాద్ విమాన ప్రమాదం కారణంగా బాధపడుతున్న కుటుంబాల పరిస్థితిని నేను బాగా అర్థం చేసుకోగలను" అని కేంద్ర పౌర విమానయాన శాఖ మంత్రి రామ్మోహన్ నాయుడు హృదయాన్ని తాకేలా వ్యాఖ్యానించారు. శనివారం ఢిల్లీలో విమాన ప్రమాదానికి సంబంధించి అత్యున్నత స్థాయి సమీక్షా సమావేశం నిర్వహించారు. ఈ సందర్భంగా అహ్మదాబాద్‌లో చోటుచేసుకున్న దుర్ఘటనపై ఆయన సమగ్రంగా చర్చించారు. ఈ ప్రమాదాన్ని కేంద్రం అత్యంత తీవ్రంగా పరిగణిస్తోందని మంత్రి రామ్మోహన్‌ నాయుడుస్పష్టం చేశారు.

ప్రమాదం జరిగిన వెంటనే సహాయక చర్యలు వేగంగా చేపట్టినట్టు వివరించిన రామ్మోహన్ నాయుడు, గుజరాత్ ప్రభుత్వం, పౌర విమానయాన శాఖల మధ్య సమన్వయం మక్కువగా కొనసాగిందన్నారు. మంటలు అదుపులోకి తీసుకురావడం, మృతదేహాల తరలింపు వంటి చర్యలు అత్యవసరంగా పూర్తయ్యాయని తెలిపారు. ఘటనపై విచారణ కోసం ఐదుగురు సభ్యులతో కూడిన ప్రత్యేక కమిటీని ఏర్పాటు చేసినట్టు వెల్లడించిన మంత్రి, అవసరమైతే సభ్యుల సంఖ్య పెంచే అవకాశం ఉందని పేర్కొన్నారు.

శుక్రవారం సాయంత్రం ఘటనా స్థలంలో బ్లాక్ బాక్స్‌ను గుర్తించినట్టు వెల్లడించిన రామ్మోహన్ నాయుడు, దానిపై పూర్తిస్థాయి విశ్లేషణ జరిగాకే ప్రమాదానికి గల అసలు కారణాలు తెలియనున్నాయన్నారు. బ్లాక్ బాక్స్ డేటా విశ్లేషణ కోసం తాము ఎదురుచూస్తున్నామని చెప్పారు. విచారణ మరింత నిగూఢంగా జరిగేందుకు హోంశాఖ సెక్రటరీ నేతృత్వంలో మరో ప్రత్యేక బృందాన్ని కూడా ఏర్పాటు చేశామని తెలిపారు. ఇందులో వివిధ రంగాలకు చెందిన నిపుణులు, అధికారులు సభ్యులుగా ఉన్నారని, ఈ బృందం సాంకేతికంగా సమగ్రమైన దర్యాప్తు చేపడుతుందని వివరించారు.

విచారణ నివేదిక రెండు నెలల్లోగా రావొచ్చని అభిప్రాయపడిన రామ్మోహన్ నాయుడు, అందరూ ఎదురుచూస్తున్న విషయాలపై పూర్తిగా వెలుగులోకి వచ్చిన తర్వాతే మీడియా ముందు వివరాలు వెల్లడిస్తామని చెప్పారు. బోయింగ్ 787 సిరీస్‌కు చెందిన విమానాలను తక్షణమే కఠినంగా తనిఖీ చేయాలని ఇప్పటికే ఆదేశాలు జారీ చేశామని తెలిపారు.