Unusual NEET Re-Exam: నీట్ రీ-ఎగ్జామ్‌లో అసాధారణం: నాగ్‌పుర్ విద్యార్థికి అబుధాబీలో పరీక్ష కేంద్రం!

Unusual NEET Re-Exam: నీట్ యూజీ రీ-ఎగ్జామ్ సమీపిస్తున్న నేపథ్యంలో నేషనల్ టెస్టింగ్ ఏజెన్సీ (NTA) జారీ చేసిన అడ్మిట్ కార్డుల్లో తీవ్ర లోపాలు వెలుగుచూశాయి. మహారాష్ట్రలోని నాగ్‌పుర్‌కు చెందిన ఒక విద్యార్థికి యునైటెడ్ అరబ్ ఎమిరేట్స్‌లోని అబుధాబీలో పరీక్షా కేంద్రం కేటాయించడం తీవ్ర చర్చనీయాంశమైంది. పరీక్షకు ఒక్కరోజు ముందు ఈ ఘటన చోటుచేసుకోవడం విద్యార్థులు, తల్లిదండ్రులను తీవ్రంగా కలవరపెడుతోంది.

అబ్దుల్లా మహ్మద్ తాలిబ్ అనే ఆ విద్యార్థి శుక్రవారం సాయంత్రం తన అడ్మిట్ కార్డును డౌన్‌లోడ్ చేసుకున్నాడు. అందులో అబుధాబీలోని ఒక భారతీయ స్కూల్‌ను పరీక్షా కేంద్రంగా పేర్కొనడం చూసి అతడు షాక్‌కు గురయ్యాడు. ఈ అడ్మిట్ కార్డు ఫోటో ప్రస్తుతం సోషల్ మీడియాలో వైరల్ అవుతోంది. తాము ఇచ్చిన ఎంపికల్లో అబుధాబీలాంటి విదేశీ కేంద్రం ఏదీ లేదని విద్యార్థి తండ్రి మీడియాతో వెల్లడించారు. ఈ విషయాన్ని వెంటనే NTA దృష్టికి తీసుకెళ్లామని, శనివారం సాయంత్రం 4 గంటల్లోగా కొత్త అడ్మిట్ కార్డు జారీ చేస్తామని హామీ ఇచ్చినట్లు తెలిపారు. సమయం తక్కువగా ఉన్నందున నాగ్‌పుర్‌లోనే పరీక్షా కేంద్రం కేటాయించాలని ఆయన డిమాండ్ చేశారు. ఈ ఘటనతో తన కుమారుడు తీవ్ర ఆందోళనలో ఉన్నట్లు తండ్రి వ్యాఖ్యానించారు.

NTA స్పందన:

ఈ సమస్యపై NTA స్పందించి, ఇది సాంకేతిక లోపం వల్ల జరిగినట్లు తెలిపింది. సంబంధిత విద్యార్థికి నాగ్‌పుర్‌లోనే పరీక్షా కేంద్రం కేటాయించేందుకు చర్యలు తీసుకుంటున్నట్లు ప్రకటించింది. అడ్మిట్ కార్డులో వ్యక్తిగత వివరాలు, పరీక్షా కేంద్రాలు లేదా ఇతర ముఖ్యమైన అంశాల్లో ఏవైనా లోపాలు ఉంటే వెంటనే తమకు తెలియజేయాలని అభ్యర్థులకు NTA సూచించింది.

జూన్ 21న జరగనున్న నీట్ రీ-ఎగ్జామ్ నేపథ్యంలో ఇప్పటికే దేశవ్యాప్తంగా మాక్ డ్రిల్‌లు మొదలయ్యాయి. ఈ లోపం వల్ల విద్యార్థుల్లో ఆందోళన నెలకొంది. NTA ఈ సమస్యలను త్వరగా పరిష్కరించి, పరీక్షను సజావుగా నిర్వహించాలని విద్యార్థి సంఘాలు, తల్లిదండ్రులు డిమాండ్ చేస్తున్నారు.