2026 T20 World Cup: 2026 టీ20 ప్రపంచకప్ ప్రారంభానికి ముందే అంతర్జాతీయ క్రికెట్లో తీవ్ర ఉద్రిక్తతలు చోటుచేసుకున్నాయి. భారత్, శ్రీలంక సంయుక్తంగా ఆతిథ్యమిస్తున్న ఈ మెగా టోర్నీలో ఆడేందుకు బంగ్లాదేశ్ విముఖత చూపడం, దానికి పాకిస్థాన్ మద్దతు తెలపడం ఇప్పుడు చర్చనీయాంశంగా మారింది.
ఈ గొడవ అంతా ఐపీఎల్ 2026 సీజన్ నుంచి బంగ్లాదేశ్ పేసర్ ముస్తాఫిజుర్ రెహ్మాన్ను కోల్కతా నైట్ రైడర్స్ విడుదల చేయడంతో మొదలైంది. భద్రతా కారణాల దృష్ట్యా తాము భారత్లో అడుగుపెట్టలేమని, ముంబై, కోల్కతాలలో జరగాల్సిన తమ గ్రూప్ మ్యాచ్లను శ్రీలంకకు మార్చాలని బంగ్లాదేశ్ క్రికెట్ బోర్డు (BCB) ఐసీసీని కోరింది. అయితే, భద్రతా ముప్పు ఏమీ లేదని భావిస్తున్న ఐసీసీ, షెడ్యూల్ను మార్చే ప్రసక్తే లేదని తేల్చి చెప్పింది. జనవరి 21 నాటికి తమ నిర్ణయాన్ని తెలపాలని బంగ్లాదేశ్కు తుది గడువు విధించింది.
బంగ్లాదేశ్ లేవనెత్తిన భద్రతా అంశాలను పాకిస్థాన్ క్రికెట్ బోర్డు (PCB) సమర్థించింది. బంగ్లాదేశ్కు న్యాయం జరగకపోతే తాము కూడా టోర్నీ నుంచి తప్పుకోవచ్చనే వార్తలు మొదట్లో హల్చల్ చేశాయి. పాకిస్థాన్ తన జట్టు సన్నాహాలను కూడా తాత్కాలికంగా నిలిపివేసిందని కొన్ని నివేదికలు పేర్కొన్నాయి. అయితే, తాజా సమాచారం ప్రకారం, పాకిస్థాన్ టోర్నీని బహిష్కరించడం లేదని పీసీబీ వర్గాలు స్పష్టం చేశాయి. తమ మ్యాచ్లన్నీ ఇప్పటికే శ్రీలంకలో షెడ్యూల్ అయ్యాయని, కాబట్టి టోర్నీ నుంచి తప్పుకోవడానికి తమకు ప్రత్యేక కారణం లేదని పీసీబీ వివరణ ఇచ్చింది.
ఒకవేళ బంగ్లాదేశ్ భారత్లో ఆడేందుకు నిరాకరించి టోర్నీ నుంచి తప్పుకుంటే, వారి స్థానంలో స్కాట్లాండ్ను గ్రూప్-బి లో చేర్చాలని ఐసీసీ యోచిస్తోంది. ఇప్పటికే పాకిస్థాన్, భారత్ మధ్య ఉన్న రాజకీయ ఉద్రిక్తతల నడుమ ఈ కొత్త వివాదం టీ20 ప్రపంచకప్ నిర్వహణపై నీలి నీడలు కమ్ముకునేలా చేసింది. ప్రస్తుతం బంగ్లాదేశ్ తన పట్టు వీడకపోతే టోర్నీ ఆరంభానికి ముందే భారీ మార్పులు చోటుచేసుకునే అవకాశం ఉంది.
