Uma Kashvi: WPL చరిత్రలోనే సరికొత్త రికార్డు: 15 ఏళ్లకే లీగ్‌లోకి ఎంట్రీ.. ఎవరీ ఉమా కాశ్వి?
ఎవరీ ఉమా కాశ్వి?
Uma Kashvi: మహిళల ప్రీమియర్ లీగ్ మినీ వేలంలో సరికొత్త చరిత్ర నమోదైంది. కేవలం 15 ఏళ్ల 202 రోజుల వయసున్న కర్ణాటక యువ సంచలనం ఉమా కాశ్వి WPL వేలంలో అమ్ముడైన అత్యంత పిన్న వయస్కురాలైన క్రీడాకారిణిగా రికార్డు సృష్టించింది. కొచ్చి వేదికగా జరిగిన మినీ వేలంలో రన్నరప్ ఢిల్లీ క్యాపిటల్స్ ఆమెను రూ. 10 లక్షల కనీస ధరకు దక్కించుకుంది. ఐపీఎల్‌లో వైభవ్ సూర్యవంశీ సృష్టించిన సంచలనాన్ని గుర్తుచేస్తూ, అంతకంటే చిన్న వయసులోనే ఉమా కాశ్వి మహిళా క్రికెట్ లీగ్‌లో అడుగుపెట్టి అందరి దృష్టినీ ఆకర్షించింది.
చరిత్ర సృష్టించిన ఉమా కాశ్వి
2011 ఏప్రిల్ 9న జన్మించిన ఉమా కాశ్వి, గతంలో ఢిల్లీ క్యాపిటల్స్ కొనుగోలు చేసిన 16 ఏళ్ల దీయా యాదవ్ పేరిట ఉన్న రికార్డును బద్దలు కొట్టింది. ఎప్పటికప్పుడు యువ ప్రతిభను గుర్తించి ప్రోత్సహించడంలో ముందుండే ఢిల్లీ ఫ్రాంచైజీ, ఈసారి కూడా అండర్-15 స్థాయిలోనే అద్భుతాలు చేస్తున్న ఉమాపై నమ్మకం ఉంచి జట్టులోకి తీసుకుంది.
ఎవరీ ఉమా కాశ్వి? క్రికెట్ ప్రయాణం ఎలా మొదలైంది?
కర్ణాటకకు చెందిన ఉమా కుడిచేతి వాటం బ్యాటర్, రైట్ ఆర్మ్ ఆఫ్ స్పిన్ బౌలర్. కేవలం ఏడున్నరేళ్ల వయసులోనే బెంగళూరులోని నైస్ క్రికెట్ అకాడమీలో చేరి ప్రొఫెషనల్ శిక్షణ ప్రారంభించింది. బీసీసీఐ మహిళల అండర్-15 వన్డే టోర్నమెంట్‌లో ఏకంగా 172 సగటుతో 516 పరుగులు చేసి ఒక్కసారిగా వెలుగులోకి వచ్చింది. ఇందులో మూడు అద్భుత శతకాలు, ఒక అర్ధశతకం ఉన్నాయి.
నాయకత్వ లక్షణాలు
కర్ణాటక అండర్-15 జట్టుకు సారథ్యం వహించడంతో పాటు కర్ణాటక మహిళా టీ20 టోర్నీ 'మహారాణి ట్రోఫీ'లో బెంగళూరు బ్లాస్టర్స్ జట్టును ముందుండి నడిపించింది. ఇండియా అండర్-19 జట్టు తరఫున శ్రీలంకపై జరిగిన సిరీస్‌లో బ్యాట్‌తో పాటు బంతితోనూ మెరిసి జట్టు విజయాల్లో కీలక పాత్ర పోషించింది.
ఢిల్లీ క్యాపిటల్స్‌కు దక్కిన వరం
మైదానంలో పరిపక్వతతో కూడిన ఆటతీరు, నిలకడైన బ్యాటింగ్, వికెట్లు తీసే ఆఫ్ స్పిన్ మాత్రమే కాకుండా అద్భుతమైన ఫీల్డింగ్ స్కిల్స్ కూడా ఉమా సొంతం. జెమిమా రోడ్రిగ్స్, షెఫాలీ వర్మ, మరిజానే కాప్, లారా వోల్వార్ట్ వంటి అంతర్జాతీయ దిగ్గజాలతో డ్రెస్సింగ్ రూమ్ పంచుకోవడం ఉమా కెరీర్‌కు ఎంతో మేలు చేస్తుందని ఆమె కోచ్‌లు విశ్వాసం వ్యక్తం చేస్తున్నారు.
ఈ సారి వేలంలో ఢిల్లీ క్యాపిటల్స్ కిరణ్ నవ్‌గిరే (రూ. 75 లక్షలు), క్రిస్టీ గోర్డాన్ (రూ. 10 లక్షలు), నజ్మా ఖాన్ (రూ. 10 లక్షలు)లను కొనుగోలు చేయడంతో పాటు ఉమా కాశ్విని చేర్చుకుని తమ బెంచ్ బలాన్ని మరింత పటిష్టం చేసుకుంది. 2027 జనవరి 14 నుంచి ప్రారంభం కానున్న ఐదో సీజన్‌లో ఈ 15 ఏళ్ల వండర్ గర్ల్ మైదానంలో ఎలాంటి మ్యాజిక్ చేస్తుందో చూడాలని క్రికెట్ ప్రపంచం ఆసక్తిగా ఎదురుచూస్తోంది.
