Asia Cup 2025: దుబాయ్ వేదికగా జరిగిన 2025 ఆసియా కప్ ఫైనల్‌లో పాకిస్తాన్‌పై ఘన విజయం సాధించి భారత జట్టు తొమ్మిదోసారి ఆసియా కప్ టైటిల్‌ను కైవసం చేసుకుంది. ఈ విజయం భారత్‌కు చాలా ప్రత్యేకమైనది, ఎందుకంటే ఈ టోర్నమెంట్‌లో పాకిస్తాన్‌పై భారత్ హ్యాట్రిక్ విజయం సాధించింది.
టాస్ గెలిచిన భారత కెప్టెన్ సూర్యకుమార్ యాదవ్ ముందుగా బౌలింగ్ ఎంచుకున్నాడు.పాకిస్తాన్ జట్టు 19.1 ఓవర్లలో 146 పరుగులకు ఆలౌట్ అయింది. పాకిస్తాన్ ఓపెనర్లు ఫర్హాన్ (57), ఫఖర్ జమాన్ (46) మంచి ఆరంభం ఇచ్చినప్పటికీ, మధ్య ఓవర్లలో భారత స్పిన్నర్లు అద్భుత ప్రదర్శన చేసి పాక్ బ్యాటింగ్ లైనప్‌ను కుప్పకూల్చారు. భారత బౌలర్లలో కుల్దీప్ యాదవ్ 4 వికెట్లు తీసి అత్యుత్తమ ప్రదర్శన కనబరిచాడు. అక్షర్ పటేల్, వరుణ్ చక్రవర్తి, జస్ప్రీత్ బుమ్రా కూడా తలా రెండు వికెట్లు తీసి పాక్‌ను తక్కువ స్కోర్‌కే కట్టడి చేశారు.
147 పరుగుల లక్ష్యంతో బరిలోకి దిగిన భారత్‌కు ఆరంభంలోనే షాక్ తగిలింది. అయితే, తెలుగు యువ బ్యాట్స్‌మెన్ తిలక్ వర్మ (69 పరుగులు నాటౌట్) అజేయమైన, ఒత్తిడిలో నిలకడైన ఇన్నింగ్స్‌ ఆడి జట్టును విజయతీరాలకు చేర్చాడు. అతని అద్భుతమైన ప్రదర్శనతో భారత్ 19.4 ఓవర్లలోనే ఐదు వికెట్ల తేడాతో విజయం సాధించింది.ఈ అద్భుతమైన ప్రదర్శనకు గాను తిలక్ వర్మకు ప్లేయర్ ఆఫ్ ది మ్యాచ్ అవార్డు లభించింది. ఈ విజయంతో భారత్ అత్యధిక ఆసియా కప్ టైటిల్స్ గెలుచుకున్న జట్టుగా తన రికార్డును కొనసాగించింది.
