Australia Squad for ODI and T20 Series: భారత్ తో వన్టే, టీ20లు.. ఆస్ట్రేలియా జట్టు ఇదే

Australia Squad for ODI and T20 Series: భారత్‌తో స్వదేశంలో జరగబోయే మూడు వన్డేల సిరీస్, తొలి రెండు టీ20 మ్యాచ్‌ల కోసం ఆస్ట్రేలియా క్రికెట్ బోర్డు తమ జట్లను ప్రకటించింది. ఈ ఎంపికల్లో స్టార్ పేసర్ మిచెల్ స్టార్క్ వన్డే జట్టులోకి తిరిగి రాగా, విధ్వంసకర ఆల్‌రౌండర్ గ్లెన్ మ్యాక్స్‌వెల్ మాత్రం జట్టులో చోటు దక్కించుకోలేకపోయాడు.

గాయం కారణంగా గత కొంతకాలంగా అంతర్జాతీయ క్రికెట్‌కు దూరంగా ఉన్న ఫాస్ట్ బౌలర్ మిచెల్ స్టార్క్ వన్డే జట్టులోకి తిరిగి వచ్చాడు. యాషెస్ టెస్ట్ సిరీస్‌కు ముందు అతని పనిభారాన్ని జాగ్రత్తగా నిర్వహించడంలో భాగంగా సౌత్ ఆఫ్రికా సిరీస్‌కు స్టార్క్‌కు విశ్రాంతినిచ్చారు. ఇప్పుడు వన్డే సిరీస్‌తో అతను అంతర్జాతీయ క్రికెట్‌లోకి అడుగుపెట్టనున్నాడు.

సెలెక్టర్ల ప్రకటన ప్రకారం, స్టార్ ఆల్‌రౌండర్ గ్లెన్ మ్యాక్స్‌వెల్ భారత్‌తో జరగనున్న టీ20 సిరీస్‌లోని తొలి రెండు మ్యాచ్‌లకు అందుబాటులో ఉండటం లేదు. న్యూజిలాండ్ పర్యటనలో అతని మణికట్టుకు అయిన ఫ్రాక్చర్ గాయం కారణంగా విశ్రాంతి తీసుకోవాల్సి వచ్చింది. దీంతో అతను టీ20 జట్టులో చోటు కోల్పోయాడు.

రెగ్యులర్ కెప్టెన్ పాట్ కమిన్స్ గైర్హాజరీలో, మిచెల్ మార్ష్ వన్డే మరియు టీ20 సిరీస్‌లకు సారథ్యం వహించనున్నాడు. మాథ్యూ రెన్షా, మాట్ షార్ట్, మిచ్ ఓవెన్ వంటి యువ ఆటగాళ్లకు వన్డే జట్టులో అవకాశం దక్కింది. జోష్ హేజిల్‌వుడ్, ట్రావిస్ హెడ్, ఆడమ్ జంపా వంటి కీలక ఆటగాళ్లు రెండు జట్లలోనూ ఉన్నారు. కామెరూన్ గ్రీన్ వన్డే సిరీస్‌లో ఆడి, తర్వాతి టెస్ట్ సిరీస్‌కు సన్నద్ధం కావడానికి టీ20 జట్టు నుంచి తప్పుకున్నాడు.

వన్డే జట్టు మిచెల్ మార్ష్ (కెప్టెన్), జేవియర్ బార్ట్‌లెట్, అలెక్స్ కారీ, కూపర్ కొన్నోలీ, బెన్ ద్వార్షుయిస్, నాథన్ ఎల్లిస్, కామెరూన్ గ్రీన్, జోష్ హేజిల్‌వుడ్, ట్రావిస్ హెడ్, జోష్ ఇంగ్లిస్, మిచెల్ ఓవెన్, మాథ్యూ రెన్షా, మాథ్యూ షార్ట్, మిచెల్ స్టార్క్, ఆడమ్ జంపా

టీ20 జట్టు (తొలి 2 మ్యాచ్‌లకు) మిచెల్ మార్ష్ (కెప్టెన్), సీన్ అబాట్, జేవియర్ బార్ట్‌లెట్, టిమ్ డేవిడ్, బెన్ ద్వార్షుయిస్, నాథన్ ఎల్లిస్, జోష్ హేజిల్‌వుడ్, ట్రావిస్ హెడ్, జోష్ ఇంగ్లిస్, మాథ్యూ కుహ్నెమాన్, మిచెల్ ఓవెన్, మాథ్యూ షార్ట్, మార్కస్ స్టోయినిస్, ఆడమ్ జంపా.