Australian Captain Mitchell Marsh: చరిత్ర సృష్టించిన ఆస్ట్రేలియా కెప్టెన్ మిచెల్ మార్ష్.. రెండో ఆటగాడిగా

Australian Captain Mitchell Marsh: ఆస్ట్రేలియా టీ20 జట్టు కెప్టెన్ మిచెల్ మార్ష్ ఇంగ్లండ్‌ వేదికగా జరుగుతున్న ‘ది హండ్రెడ్ 2026’ టోర్నీలో సన్‌రైజర్స్ లీడ్స్ తరఫున ఆడుతున్నారు. మంగళవారం (ఆగస్టు 11) మాంచెస్టర్‌లోని ఓల్డ్ ట్రాఫోర్డ్ వేదికగా మాంచెస్టర్ సూపర్‌ జెయింట్స్‌తో జరిగిన మ్యాచ్‌లో మార్ష్ 23 బంతుల్లో 32 పరుగులు సాధించారు.

ఈ టోర్నీలో లీగ్ దశ చివరి మ్యాచ్‌ ద్వారా మార్ష్ ఈ సీజన్‌లో మొత్తం 406 పరుగుల మైలురాయిని అందుకున్నారు. ‘ది హండ్రెడ్’ పురుషుల టోర్నీ చరిత్రలో ఒకే సీజన్‌లో 400 పరుగుల మార్క్‌ను అందుకున్న తొలి ఓవర్సీస్ (విదేశీ) ఆటగాడిగా, మొత్తంగా రెండో క్రికెటర్‌గా మిచెల్ మార్ష్ చరిత్ర సృష్టించారు. ఇంగ్లండ్‌కు చెందిన జేమ్స్ విన్స్ గతంలో ఈ ఘనత సాధించిన మొదటి ఆటగాడిగా నిలిచారు. అతను 2024 సీజన్‌లో సదరన్ బ్రేవ్ తరఫున 10 మ్యాచ్‌ల్లో కలిపి 424 పరుగులు చేశారు.

మాంచెస్టర్‌తో జరిగిన మ్యాచ్‌లో మార్ష్ ఐదు ఫోర్లు, ఒక సిక్సర్‌ బాదారు. నూర్ అహ్మద్ బౌలింగ్‌లో కొట్టిన ఆ ఒక్క సిక్సర్‌తో కలిపి, 2026 సంవత్సరంలో ఇప్పటివరకు ఆయన బాదిన మొత్తం టీ20 సిక్సర్ల సంఖ్య 94కి చేరింది. ఒక కేలండర్ ఇయర్‌లో టీ20 క్రికెట్‌లో ఆస్ట్రేలియా తరఫున అత్యధిక సిక్సర్లు బాదిన రికార్డును మార్ష్ సమం చేశారు. గతంలో 2025 సంవత్సరంలో టిమ్ డేవిడ్ కూడా 56 మ్యాచ్‌ల్లో 94 సిక్సర్లు కొట్టారు.

2026 సంవత్సరంలో మిచెల్ మార్ష్ పలు ప్రధాన టోర్నీల్లో ప్రాతినిధ్యం వహించారు. ‘ది హండ్రెడ్’ టోర్నీలో సన్‌రైజర్స్ లీడ్స్ తరఫున, ఆస్ట్రేలియా టీ20 జట్టుకు కెప్టెన్‌గా వ్యవహరించడంతో పాటు.. ఐపీఎల్ 2026లో లక్నో సూపర్ జెయింట్స్, బిగ్ బాష్ లీగ్ (BBL) 2025-26 సీజన్‌లో పెర్త్ స్కార్చర్స్ జట్ల తరఫున ఆడారు.

ఈ ఏడాది ప్రారంభంలో పెర్త్ స్కార్చర్స్ జట్టు బీబీఎల్ టైటిల్ గెలవడంలో మార్ష్ కీలక పాత్ర పోషించారు. అయితే ఆయన కెప్టెన్సీలోని ఆస్ట్రేలియా జట్టు టీ20 ప్రపంచ కప్ 2026 టోర్నీలో సూపర్-8 దశకు చేరలేకపోయింది. అలాగే ఐపీఎల్‌లో లక్నో సూపర్ జెయింట్స్ పాయింట్ల పట్టికలో 10వ స్థానంతో సరిపెట్టుకుంది. మంగళవారం జరిగిన మ్యాచ్‌లో మాంచెస్టర్ జట్టుపై సన్‌రైజర్స్ లీడ్స్ విజయం సాధిస్తే, మార్ష్‌ జట్టుకు ఈ టోర్నీలో మరో మ్యాచ్ ఆడే అవకాశం లభిస్తుంది.