BCCI Backs Laxman’s Mentorship: లక్ష్మణ్ మార్గదర్శకత్వానికి బీసీసీఐ జేజేలు

BCCI Backs Laxman’s Mentorship: యూత్ వరల్డ్ కప్‌లో టీమిండియా మరోసారి తన విశ్వరూపాన్ని ప్రదర్శించింది. హరారే వేదికగా జరిగిన ఫైనల్‌లో ఇంగ్లాండ్‌ను 100 పరుగుల తేడాతో చిత్తు చేసిన భారత్, రికార్డు స్థాయిలో ఆరోసారి అండర్-19 ప్రపంచకప్ టైటిల్‌ను ముద్దాడింది. ఈ చారిత్రాత్మక విజయంపై భారత క్రికెట్ నియంత్రణ మండలి (BCCI) హర్షం వ్యక్తం చేస్తూ, జట్టు సభ్యులతో పాటు తెర వెనుక కృషి చేసిన దిగ్గజాలకు ప్రత్యేక అభినందనలు తెలిపింది.

ముఖ్యంగా, బెంగళూరులోని నేషనల్ క్రికెట్ అకాడమీ (ప్రస్తుతం సెంటర్ ఆఫ్ ఎక్సలెన్స్) హెడ్ వి.వి.ఎస్. లక్ష్మణ్‌పై బీసీసీఐ ప్రశంసల జల్లు కురిపించింది. జూనియర్ స్థాయి నుంచి సీనియర్ స్థాయికి ఆటగాళ్లు వెళ్లే క్రమంలో లక్ష్మణ్ రూపొందించిన ప్రణాళికలు, విజన్ అద్భుతంగా పనిచేశాయని బోర్డు కొనియాడింది. యువ ఆటగాళ్లను తీర్చిదిద్దడంలో ఆయన పాత్ర కీలకమని, ఈ విజయం భారత క్రికెట్ పునాదులు ఎంత బలంగా ఉన్నాయో నిరూపిస్తోందని పేర్కొంది.

ప్రస్తుతం భారత్ అటు పురుషుల, ఇటు మహిళల అండర్-19 ప్రపంచకప్ టైటిల్స్ రెండింటినీ తన వద్దే ఉంచుకోవడం విశేషం. హెడ్ కోచ్ హృషికేష్ కనిట్కర్ మార్గదర్శకత్వంలో టీమ్ అజేయంగా ఈ టోర్నీని ముగించింది. జూనియర్ క్రికెట్ కమిటీ సరైన ప్రతిభను గుర్తించడం వల్లే అన్ని పరిస్థితుల్లోనూ రాణించగల పటిష్టమైన జట్టు తయారైందని బోర్డు ప్రశంసించింది.