BCCI Revenue: భారత క్రికెట్ నియంత్రణ మండలి (BCCI) 2023-24 ఆర్థిక సంవత్సరంలో రికార్డు స్థాయిలో రూ. 9,741.7 కోట్ల ఆదాయాన్ని ఆర్జించిందని ప్రకటించింది. ప్రపంచంలోనే అత్యంత ధనిక క్రికెట్ బోర్డు అయిన బీసీసీఐకి ఇది మరో భారీ విజయం. బీసీసీఐ ఆదాయంలో అత్యధిక భాగం ఇండియన్ ప్రీమియర్ లీగ్ (IPL) నుండే వస్తుంది. గత రెండేళ్లలో బీసీసీఐ ఆదాయం దాదాపు రూ. 5 వేల కోట్లు పెరిగింది. ఈ గణాంకాలు బీసీసీఐ ఆర్థికంగా ఎంత బలంగా ఉందో తెలియజేస్తున్నాయి. ఐపీఎల్ బీసీసీఐకి ప్రధాన ఆదాయ వనరుగా ఉండగా, ఇతర మార్గాలను కూడా పెంచుకునేందుకు బీసీసీఐ కృషి చేస్తోందని తెలుస్తోంది. రంజీ ట్రోఫీ, దులీప్ ట్రోఫీ వంటి దేశీయ టోర్నమెంట్ల వాణిజ్యీకరణకు కూడా అపారమైన సామర్థ్యం ఉందని నిపుణులు అభిప్రాయపడుతున్నారు.
బీసీసీఐ ఆదాయం ఏడాదికి ఏడాది పెరుగుతోంది.
2021-22 ఆర్థిక సంవత్సరంలో రూ. 4,360 కోట్లు
2022-23 ఆర్థిక సంవత్సరంలో రూ. 6,820 కోట్లు
2023-24 ఆర్థిక సంవత్సరంలో రూ. 9,741.7 కోట్లు
ఐపీఎల్ (IPL): రూ. 5,761 కోట్లు, ఇది మొత్తం ఆదాయంలో సుమారు 59%. ఐపీఎల్ అనేది బీసీసీఐకి "బంగారు బాతు" వంటిదని నిరూపించింది. 2007లో ప్రారంభమైన ఐపీఎల్, మీడియా హక్కుల అమ్మకాల ద్వారా భారీ ఆదాయాన్ని తెచ్చిపెడుతోంది. 2023-27 సైకిల్‌కు సంబంధించిన ఐపీఎల్ మీడియా హక్కులు రూ. 48,390 కోట్లకు అమ్ముడుపోయాయి.
అంతర్జాతీయ క్రికెట్ కౌన్సిల్ (ICC) వాటా: రూ. 1,042 కోట్లు, ఇది మొత్తం ఆదాయంలో సుమారు 10.7%. ఐసీసీ ఆదాయంలో సింహభాగాన్ని బీసీసీఐ పొందుతోంది, ఎందుకంటే ఐసీసీ ఈవెంట్ల ఆదాయంలో 80% పైగా భారత మార్కెట్ నుండే వస్తుంది.
ఐపీఎల్ మినహా ఇతర మీడియా హక్కులు (అంతర్జాతీయ మ్యాచ్‌లు): రూ. 361 కోట్లు (3.7%). టీమిండియా ఆడే అంతర్జాతీయ మ్యాచ్‌ల బ్రాడ్‌కాస్టింగ్ హక్కుల ద్వారా ఈ ఆదాయం వస్తుంది.
విమెన్స్ ప్రీమియర్ లీగ్ (WPL): రూ. 378 కోట్లు (3.9%). డబ్ల్యూపీఎల్ ద్వారా కూడా బీసీసీఐకి చెప్పుకోదగ్గ ఆదాయం లభిస్తోంది.
టిక్కెట్లు, కమర్షియల్ రైట్స్ (హోమ్ మ్యాచ్‌లు): రూ. 361 కోట్లు (3.7%).
