Bangladesh Clinch the Series: పాకిస్థాన్‌ కు బిగ్ షాక్.. బంగ్లాదేశ్ సిరీస్‌ కైవసం !

Bangladesh Clinch the Series: పాకిస్థాన్‌తో జరిగిన నిర్ణయాత్మకమైన మూడో వన్డేలో బంగ్లాదేశ్ 11 పరుగుల స్వల్ప తేడాతో విజయం సాధించి, సిరీస్‌ను 2-1తో కైవసం చేసుకుంది. ఆదివారం జరిగిన ఈ ఉత్కంఠభరిత పోరులో యువ ఓపెనర్ తంజిద్ హసన్ మెరుపు సెంచరీతో ఆకట్టుకోగా, పేసర్ తస్కిన్ అహ్మద్ నాలుగు వికెట్లతో పాక్ పతనాన్ని శాసించాడు. బంగ్లాదేశ్ నిర్దేశించిన 290 పరుగుల లక్ష్యాన్ని ఛేదించే క్రమంలో పాకిస్థాన్ గట్టిగానే పోరాడినప్పటికీ, నిర్ణీత ఓవర్లలో 279 పరుగులకే ఆలౌట్ అయి ఓటమిని చవిచూసింది.

షెర్-ఏ-బంగ్లా నేషనల్ క్రికెట్ స్టేడియంలో టాస్ గెలిచి తొలుత బ్యాటింగ్ చేసిన బంగ్లాదేశ్‌కు తంజిద్ హసన్ అదిరిపోయే ఆరంభాన్ని ఇచ్చాడు. తన వన్డే కెరీర్‌లో తొలి సెంచరీని నమోదు చేసిన తంజిద్, కేవలం 107 బంతుల్లోనే 107 పరుగులు సాధించాడు. ఇందులో ఆరు ఫోర్లు, ఏడు భారీ సిక్సర్లు ఉండటం విశేషం. మరో ఓపెనర్ సైఫ్ హసన్‌తో కలిసి ఇతడు మొదటి వికెట్‌కు 105 పరుగుల భాగస్వామ్యాన్ని నెలకొల్పి జట్టుకు పటిష్టమైన పునాది వేశాడు. సైఫ్ హసన్ 55 బంతుల్లో 36 పరుగులు చేసి నిలకడగా ఆడుతున్న సమయంలో షాహీన్ షా ఆఫ్రిది ఈ జోడీని విడదీశాడు.

తర్వాతి క్రమంలో తంజిద్ హసన్ తన జోరును కొనసాగిస్తూ 47 బంతుల్లో హాఫ్ సెంచరీ, 98 బంతుల్లో సెంచరీ మార్కును అందుకున్నాడు. అద్భుతమైన ఫామ్‌లో ఉన్న తంజిద్‌ను 37వ ఓవర్లో అబ్రార్ అహ్మద్ పెవిలియన్‌కు పంపడంతో బంగ్లా స్కోరు 194/3 వద్ద నిలిచింది. మిడిల్ ఆర్డర్‌లో లిటన్ దాస్ (41), తౌహీద్ హృదోయ్ (48 నాటౌట్) వేగంగా ఆడటంతో బంగ్లాదేశ్ నిర్ణీత 50 ఓవర్లలో ఐదు వికెట్ల నష్టానికి 290 పరుగులు చేసింది. పాక్ బౌలర్లలో హరీస్ రౌఫ్ మూడు వికెట్లు తీసి రాణించగా, ఆఫ్రిది, అబ్రార్ చెరో వికెట్ దక్కించుకున్నారు.

లక్ష్య ఛేదనలో పాకిస్థాన్ ఒకానొక దశలో 82 పరుగులకే 5 వికెట్లు కోల్పోయి పీకల్లోతు కష్టాల్లో పడింది. అయితే సల్మాన్ అఘా వీరోచిత పోరాటం చేస్తూ 106 పరుగులు సాధించి పాకిస్థాన్‌ను రేసులోకి తెచ్చాడు. అతనికి తస్కిన్ అహ్మద్, ముస్తాఫిజుర్ రెహమాన్ తమ పదునైన బౌలింగ్‌తో అడ్డుకట్ట వేశారు. తస్కిన్ 49 పరుగులిచ్చి 4 వికెట్లు పడగొట్టగా, ముస్తాఫిజుర్ 3 వికెట్లు తీసి బంగ్లాదేశ్ విజయాన్ని ఖాయం చేశారు. అద్భుత ప్రదర్శన చేసిన తంజిద్ హసన్‌కు 'ప్లేయర్ ఆఫ్ ది మ్యాచ్' మరియు 'ప్లేయర్ ఆఫ్ ది సిరీస్' అవార్డులు దక్కాయి.