Board of Control for Cricket in India: మాజీ మహిళా క్రికెటర్లకు తీపి కబురు.. కీలక పెన్షన్ పథకాలు

Board of Control for Cricket in India: దేశంలో మహిళా క్రికెట్ అభివృద్ధికి తోడ్పడిన మాజీ క్రీడాకారిణులను గౌరవించేందుకు మధ్యప్రదేశ్ క్రికెట్ అసోసియేషన్, కర్ణాటక రాష్ట్ర క్రికెట్ అసోసియేషన్ చారిత్రాత్మక నిర్ణయాలు తీసుకున్నాయి. మైదానంలో తమ ప్రతిభను చాటిన మాజీ మహిళా క్రికెటర్లకు నెలవారీ ఆర్థిక సాయం అందించేందుకు ప్రత్యేక పెన్షన్ పథకాలను ప్రకటించాయి. ముఖ్యంగా బీసీసీఐ నుంచి ఎలాంటి పెన్షన్ లేదా ఆర్థిక ప్రయోజనాలు పొందని క్రీడాకారిణులకు ఈ పథకం వర్తిస్తుందని రెండు రాష్ట్ర బోర్డులు స్పష్టం చేశాయి.

మధ్యప్రదేశ్ క్రికెట్ అసోసియేషన్ మేనేజింగ్ కమిటీ సమావేశంలో అధ్యక్షుడు మహానారాయణమన్ సింధియా ప్రతిపాదించిన ఈ పథకానికి ఏకగ్రీవ ఆమోదం లభించింది. దీని ప్రకారం అంతర్జాతీయ స్థాయిలో టెస్టులు మరియు వన్డేలు ఆడిన మహిళా క్రికెటర్లకు నెలకు 18,500 రూపాయల వరకు (75 ఏళ్లు పైబడిన వారికి అదనపు మొత్తంతో కలిపి) పెన్షన్ అందనుంది. డొమెస్టిక్ క్రికెట్ ఆడిన వారికి వారు ఆడిన మ్యాచ్‌ల సంఖ్యను బట్టి నెలకు 6,000 నుండి 10,000 రూపాయల వరకు ఆర్థిక సాయం అందుతుంది. ఇదే సమావేశంలో ఎంపీసీఏకు రంజీ ట్రోఫీని అందించిన చంద్రకాంత్ పండిట్‌ను మరో రెండేళ్ల పాటు డైరెక్టర్‌గా కొనసాగించాలని, అలాగే అంపైర్లు, కోచ్‌లు, స్కోరర్ల గౌరవ వేతనాలను పెంచాలని నిర్ణయించారు.

మరోవైపు కర్ణాటక రాష్ట్ర క్రికెట్ అసోసియేషన్ కూడా రాష్ట్రం తరపున సీనియర్ నేషనల్ ఛాంపియన్‌షిప్‌లో ఆడిన మాజీ మహిళా క్రికెటర్ల కోసం ఇటువంటి పెన్షన్ విధానాన్నే ప్రవేశపెట్టింది. 55 ఏళ్లు నిండిన క్రీడాకారిణులు ఈ పథకానికి అర్హులని కేఎస్‌సీఏ కార్యదర్శి సంతోష్ మీనన్ తెలిపారు. రాష్ట్ర క్రికెట్‌కు వారు చేసిన సేవలను గుర్తించి, వారిని గౌరవించడమే ఈ నిర్ణయం వెనుక ఉన్న ప్రధాన ఉద్దేశమని ఆయన పేర్కొన్నారు. అర్హులైన క్రీడాకారిణులు తమ మ్యాచ్ వివరాలు మరియు ధృవీకరణ పత్రాలను సమర్పించి ఈ ప్రయోజనాన్ని పొందవచ్చు. ఈ రెండు రాష్ట్ర బోర్డుల నిర్ణయాలపై క్రీడాకారులు హర్షం వ్యక్తం చేస్తున్నారు.