Sir Garfield Sobers: క్రికెట్ ప్రపంచంలో మహా విషాదం.. లెజెండరీ ఆల్‌రౌండర్ సర్ గ్యారీ సోబర్స్ కన్నుమూత!

Sir Garfield Sobers: క్రికెట్ ప్రపంచంలో ఒక సుదీర్ఘమైన, అత్యంత అద్భుతమైన మహా ఇన్నింగ్స్ ముగిసింది. క్రికెట్ చరిత్రలోనే అత్యుత్తమ ఆల్‌రౌండర్‌గా గుర్తింపు పొందిన వెస్టిండీస్ లెజెండ్ సర్ గార్ఫీల్డ్ సోబర్స్ ఇకలేరు. 89 సంవత్సరాల వయసులో ఆయన బార్బడోస్‌లోని తన నివాసంలో కన్నుమూశారు. ఈ విషాద వార్తను వెస్టిండీస్ క్రికెట్ బోర్డు అధికారికంగా ప్రకటించింది.

క్రికెట్ గాడ్ ఫాదర్.. ఒకే ఒక్కడు!

సర్ గ్యారీ సోబర్స్.. క్రికెట్ చరిత్రను తిరగరాసిన మహానుభావుడు. 1954 నుంచి 1974 వరకు రెండు దశాబ్దాల పాటు వెస్టిండీస్ జట్టు తరఫున ఆయన చేసిన విన్యాసాలు అమోఘం. 93 టెస్ట్ మ్యాచ్‌ల్లో ప్రాతినిధ్యం వహించిన సోబర్స్.. 57.78 సగటుతో 8,032 పరుగులు సాధించారు. ఇందులో 26 సెంచరీలు ఉన్నాయి. కేవలం బ్యాటింగ్‌తోనే కాదు.. బౌలింగ్‌లోనూ లెఫ్ట్ ఆర్మ్ ఫాస్ట్-మీడియం, ఆర్థోడాక్స్ స్పిన్, రిస్ట్ స్పిన్.. ఇలా అన్ని రకాలుగా బౌలింగ్ చేస్తూ 235 వికెట్లు పడగొట్టి అసాధ్యుడిగా నిలిచారు.

ఒకే ఓవర్లో 6 సిక్సర్లు.. ఆ రికార్డుల రారాజు!

క్రికెట్ చరిత్రలో ఒకే ఓవర్లో 6 సిక్సర్లు కొట్టిన మొట్టమొదటి బ్యాటర్‌గా సర్ గ్యారీ సోబర్స్ రికార్డు సృష్టించారు. 1968లో నాటింగ్‌హామ్‌షైర్ తరఫున ఆడుతూ గ్లామోర్గాన్ బౌలర్ మాల్కం నాష్ ఓవర్లో ఆయన ఈ ఘనత సాధించారు. అంతేకాదు, 1958లో పాకిస్తాన్‌పై ఆయన చేసిన 365 పరుగుల నాటౌట్ ఇన్నింగ్స్.. దాదాపు 36 సంవత్సరాల పాటు ప్రపంచ రికార్డుగా నిలిచిపోయింది.

ఆయన సేవలకు గుర్తింపుగా ఐసీసీ ప్రతి ఏటా ఇచ్చే అత్యుత్తమ క్రికెటర్ అవార్డుకు 'సర్ గార్ఫీల్డ్ సోబర్స్ ట్రోఫీ' అని పేరు పెట్టింది. 1975లో ఆయనను నైట్‌హుడ్ పురస్కారంతో గౌరవించారు. ఆయన మృతి పట్ల బీసీసీఐ, ఐసీసీతో పాటు ప్రపంచవ్యాప్తంగా ఉన్న కోట్లాది మంది క్రికెట్ అభిమానులు, ప్రముఖులు తీవ్ర సంతాపం వ్యక్తం చేస్తున్నారు.