Gautam Gambhir: గంభీర్ను జై షా ఎలా ఒప్పించారో తెలుసా? టీమ్ ఇండియా హెడ్ కోచ్ వెనుక అసలు కథ ఇదే!
టీమ్ ఇండియా హెడ్ కోచ్ వెనుక అసలు కథ ఇదే!
Gautam Gambhir: భారత క్రికెట్ జట్టు ప్రధాన కోచ్గా గౌతమ్ గంభీర్ నియామకం 2024 జూలైలో అందరినీ ఆశ్చర్యపరిచింది. రాహుల్ ద్రవిడ్ పదవీ కాలం ముగిసిన తర్వాత ఆ బాధ్యతలు చేపట్టిన గంభీర్, అప్పటి వరకు కనీసం ఒక్క ఫ్రాంచైజీకి కూడా హెడ్ కోచ్గా పనిచేసిన అనుభవం లేదు. కేవలం మెంటార్గా మాత్రమే ఉన్న గంభీర్ను అంత పెద్ద బాధ్యతకు జై షా ఎలా ఎంపిక చేశారు, గంభీర్ ఎందుకు ఒప్పుకోవాల్సి వచ్చింది అనే విషయాలను ఆయన తాజాగా ఒక పాడ్కాస్ట్లో బయటపెట్టారు. ఐపీఎల్ సమయంలో ముంబై ఇండియన్స్తో కోల్కతా నైట్ రైడర్స్ మ్యాచ్ జరుగుతున్నప్పుడు ముంబైలోని సెయింట్ రెగిస్ హోటల్లో గంభీర్ ఉన్నారని, అప్పుడు జై షా తెల్లవారుజామునే ఫోన్ చేసి ఈ ప్రతిపాదనను ఆయన ముందుంచారని గంభీర్ వెల్లడించారు.
జై షా ఫోన్ చేసి 'నేను నీకు ఒక ఆఫర్ ఇస్తున్నాను, నువ్వు దీనికి నాకు నో చెప్పడానికి వీల్లేదు' అని అన్నారని గంభీర్ గుర్తు చేసుకున్నారు. హెడ్ కోచ్గా బాధ్యతలు తీసుకోవాలని చెప్పగానే తాను ఒక్కసారిగా ఆశ్చర్యపోయానని, ఎందుకంటే ఆ సమయంలో తాను ఆ పదవికి అస్సలు సిద్ధంగా లేనని ఆయన పేర్కొన్నారు. ఏ జట్టుకూ హెడ్ కోచ్గా పనిచేసిన అనుభవం లేకపోయినా, తనపై నమ్మకంతో అంతటి హై ప్రొఫైల్ ఉద్యోగాన్ని అప్పగించినందుకు జై షాకు గంభీర్ కృతజ్ఞతలు తెలిపారు. టీమ్ ఇండియా జెర్సీని మళ్ళీ ధరించి దేశం కోసం పనిచేసే అవకాశం రావడం ఒక గౌరవంగా భావించి, తన కుటుంబంతో చర్చించిన తర్వాత ఈ సవాలును స్వీకరించినట్లు ఆయన చెప్పారు.
కోచ్గా బాధ్యతలు చేపట్టిన తర్వాత గంభీర్ నాయకత్వంలో భారత్ రెండు ఐసీసీ ట్రోఫీలు గెలిచినప్పటికీ, స్వదేశంలో న్యూజిలాండ్ మరియు దక్షిణాఫ్రికా చేతుల్లో ఎదురైన ఘోర పరాజయాలను ఆయన అస్సలు మర్చిపోలేకపోతున్నారు. ఆ క్లిష్ట పరిస్థితుల్లో తన గురించి ఎవరూ పట్టించుకోనప్పుడు కూడా జై షా స్వయంగా ఫోన్ చేసి తనకు ధైర్యం చెప్పారని గంభీర్ భావోద్వేగానికి లోనయ్యారు. ముఖ్యంగా న్యూజిలాండ్తో ముంబైలో ఓడిపోయిన తర్వాత తాను ఎయిర్పోర్ట్కు వెళ్తుండగా జై షా ఫోన్ చేసి 'నీకు తోడుగా నేను ఉన్నాను, బలంగా ఉండు' అని మద్దతు ఇచ్చారని చెప్పారు. విజయాల్లో ఉన్నప్పుడు అందరూ వెంట ఉంటారని, కానీ కష్టకాలంలో వెన్నుతట్టి ప్రోత్సహించిన జై షా అందించిన మద్దతును తాను ఎప్పటికీ మర్చిపోలేనని గంభీర్ స్పష్టం చేశారు.
