Harry Brook: 114 బంతుల్లోనే డబుల్ సెంచరీ.. గిల్ రికార్డును బద్దలు కొట్టిన హ్యారీ బ్రూక్

Harry Brook: వన్డే అంతర్జాతీయ క్రికెట్ చరిత్రలోనే కనీవినీ ఎరుగని సరికొత్త సంచలనం నమోదైంది. పాకిస్థాన్ వేదికగా శ్రీలంకతో జరుగుతున్న ముక్కోణపు వన్డే సిరీస్‌లో ఇంగ్లాండ్ కెప్టెన్ హ్యారీ బ్రూక్ ఆకాశమే హద్దుగా చెలరేగిపోయాడు. కేవలం 114 బంతుల్లోనే డబుల్ సెంచరీ పూర్తి చేసి, వన్డే క్రికెట్ చరిత్రలో 'అత్యంత వేగవంతమైన డబుల్ సెంచరీ బాదిన బ్యాటర్‌గా ప్రపంచ రికార్డు సృష్టించాడు. గత నెలలోనే వెస్టిండీస్‌పై 117 బంతుల్లో ద్విశతకం సాధించి రికార్డు నెలకొల్పిన భారత కెప్టెన్ శుభ్‌మన్ గిల్ పేరిట ఉన్న ఆ రికార్డును బ్రూక్ తుడిచిపెట్టేశాడు. అంతేకాకుండా వన్డేల్లో డబుల్ సెంచరీ సాధించిన మొట్టమొదటి ఇంగ్లాండ్ క్రికెటర్‌గానూ చరిత్రకెక్కాడు.

రావల్పిండిలో సిక్సర్ల తుఫాన్

రావల్పిండి క్రికెట్ స్టేడియంలో టాస్ గెలిచి బ్యాటింగ్‌కు దిగిన ఇంగ్లాండ్‌కు ఓపెనర్లు టామ్ బాంటన్ (50), బెన్ డకెట్ (29) మొదటి వికెట్‌కు 74 పరుగుల భాగస్వామ్యంతో శుభారంభం ఇచ్చారు. ఆ తర్వాత నాలుగో స్థానంలో క్రీజులోకి వచ్చిన కెప్టెన్ హ్యారీ బ్రూక్ తొలుత ఆచితూచి ఆడాడు. క్రీజులో కుదురుకున్నాక లంక బౌలర్లపై విరుచుకుపడ్డాడు. కేవలం 43 బంతుల్లో హాఫ్ సెంచరీ పూర్తి చేసిన బ్రూక్, తర్వాతి 31 బంతుల్లోనే శతక్కొట్టేసి 74 బంతుల్లో సెంచరీ మైలురాయిని చేరాడు.

40 బంతుల్లోనే మరో 100 పరుగులు!

సెంచరీ పూర్తయ్యాక బ్రూక్ బ్యాటింగ్ మరింత భీకరంగా మారింది. తర్వాతి 100 పరుగులను రాబట్టడానికి అతను కేవలం 40 బంతులు మాత్రమే తీసుకోవడం విశేషం. 49వ ఓవర్లో 185 పరుగుల వద్ద క్యాచ్ డ్రాప్ రూపంలో లభించిన జీవనదానాన్ని బ్రూక్ పూర్తిగా సద్వినియోగం చేసుకున్నాడు. ఆఖరి ఓవర్లో ద్విశతకం చేరడానికి 14 పరుగులు అవసరమైన తరుణంలో, ఫోర్ కొట్టి 114 బంతుల్లోనే 200 మార్కును తాకి చరిత్ర సృష్టించాడు. చివరి బంతికి ఔట్ అయ్యే సమయానికి అతను 116 బంతుల్లో 21 ఫోర్లు, 10 భారీ సిక్సర్లతో 202 పరుగులు చేసి పెవిలియన్ చేరాడు.

వన్డేల్లో అత్యంత వేగవంతమైన డబుల్ సెంచరీలు

హ్యారీ బ్రూక్ (ఇంగ్లాండ్) – 114 బంతులు (vs శ్రీలంక, రావల్పిండి, 2026)

శుభ్‌మన్ గిల్ (భారత్) – 117 బంతులు (vs వెస్టిండీస్, గౌహతి, 2026)

ఇషాన్ కిషన్ (భారత్) – 126 బంతులు (vs బంగ్లాదేశ్, చటోగ్రామ్, 2022)

గ్లెన్ మ్యాక్స్‌వెల్ (ఆస్ట్రేలియా) – 128 బంతులు (vs ఆఫ్ఘనిస్తాన్, ముంబై, 2023)

పతుమ్ నిస్సంక (శ్రీలంక) – 136 బంతులు (vs ఆఫ్ఘనిస్తాన్, పల్లెకెలె, 2024)

ఇంగ్లాండ్ రికార్డు స్కోరు 429/4

బ్రూక్‌కు తోడుగా వెటరన్ బ్యాటర్ జో రూట్ (66 బంతుల్లో 69) మూడో వికెట్‌కు 159 పరుగుల కీలక భాగస్వామ్యం నెలకొల్పాడు. రూట్ నిష్క్రమణ అనంతరం క్రీజులోకి వచ్చిన విల్ జాక్స్ కేవలం 30 బంతుల్లోనే 66 పరుగులతో మెరుపు క్యామియో ఆడాడు. వీరి విధ్వంసంతో ఇంగ్లాండ్ నిర్ణీత 50 ఓవర్లలో 4 వికెట్ల నష్టానికి 429 పరుగుల భారీ స్కోరు సాధించి శ్రీలంక ముందు కొండంత లక్ష్యాన్ని ఉంచింది. 50 ఓవర్ల ఫార్మాట్‌లో ఇప్పటివరకు డబుల్ సెంచరీ సాధించిన ప్రపంచంలోని 11 మంది దిగ్గజ బ్యాటర్ల ఎలైట్ క్లబ్‌లో బ్రూక్ సగర్వంగా అడుగుపెట్టాడు.