FIFA World Cup: బెల్జియంకు ఈజిప్ట్ షాక్.. 'ఓన్ గోల్'తో బతికిపోయిన వరల్డ్ కప్ ఫేవరెట్!

FIFA World Cup: ఫిఫా వరల్డ్‌ కప్‌లో ఫేవరెట్‌ జట్లలో ఒకటైన బెల్జియంకు తొలి మ్యాచ్‌లోనే ఊహించని షాక్ తగిలింది. గ్రూప్-జిలో భాగంగా ఈజిప్ట్‌తో జరిగిన పోరులో బెల్జియం 1–1తో మ్యాచ్‌ను డ్రాగా ముగించి నిరాశ పరిచింది. బెల్జియం స్టార్ ప్లేయర్లు రొమేలు లుకాకు, కెవిన్‌ డి బ్రూయిన్‌లకు గోల్స్ చేసేందుకు బోలెడన్ని అవకాశాలు వచ్చినా.. వాటిని చేజార్చుకున్నారు.

మ్యాచ్ ఆరంభంలోనే ఈజిప్ట్ దూకుడు ప్రదర్శించింది. ఆట 19వ నిమిషంలో ఇమామ్‌ అషూర్‌ అద్భుతమైన గోల్‌తో ఈజిప్ట్‌కు 1-0 ఆధిక్యాన్ని అందించాడు. అంతర్జాతీయ కెరీర్‌లో అషూర్‌కు ఇదే తొలి గోల్ కావడం విశేషం. దాంతో తొలి హాఫ్ మొత్తం బెల్జియం డిఫెన్స్‌లో తడబడుతూ తీవ్ర ఒత్తిడిలో కనిపించింది.

అయితే సెకండాఫ్‌లో సబ్‌స్టిట్యూట్‌గా రొమేలు లుకాకు మైదానంలోకి అడుగుపెట్టడంతో మ్యాచ్ స్వరూపమే మారిపోయింది. లుకాకు గ్రౌండ్‌లోకి వచ్చిన కేవలం 23 సెకన్లలోనే ఈజిఫ్ట్‌ డిఫెన్స్‌పై ఎదురుదాడి ప్రారంభించాడు. ఆట 66వ నిమిషంలో లుకాకు మెరుపు వేగంతో బంతిని గోల్ పోస్ట్ వైపు నెట్టే ప్రయత్నం చేయగా.. దానిని అడ్డుకోబోయిన ఈజిప్ట్ డిఫెండర్ మహ్మద్‌ హనీ పొరపాటున 'ఓన్ గోల్' చేశాడు. దాంతో బెల్జియం ఖాతా తెరిచి, స్కోరు 1–1తో సమమైంది. ఒకవేళ ఈ గోల్ పడకపోతే, గత 2022 ఖతార్ వరల్డ్ కప్ లాగే బెల్జియం ఈసారి కూడా లీగ్ దశలోనే ఇంటిబాట పట్టే పరిస్థితి వచ్చేది.

మ్యాచ్ అంతటా బెల్జియం ఎక్కువ శాతం బంతిని తన ఆధీనంలోనే ఉంచుకున్నా, ఫినిషింగ్‌లో మాత్రం దారుణంగా విఫలమైంది. మిడ్‌ ఫీల్డర్‌ కెవిన్ డి బ్రూయిన్‌ చేసిన రెండు గోల్ ప్రయత్నాలు కొద్దిలో మిస్ అయ్యాయి. ఇక మ్యాచ్ ముగిసే ఆఖరి నిమిషంలో లుకాకు హెడర్‌ ద్వారా గోల్‌ చేసే గోల్డెన్ చాన్స్ వచ్చినా.. బంతి గోల్‌ పోస్ట్‌ పైనుంచి దూసుకెళ్లింది. దాంతో పసికూన ఈజిప్ట్‌ చేతిలో బెల్జియం డ్రాతో సరిపెట్టుకోవాల్సి వచ్చింది.