FIFA World Cup: మెస్సీ చారిత్రాత్మక హ్యాట్రిక్ రికార్డ్.. వరల్డ్ కప్లో అర్జెంటీనా విశ్వరూపం
వరల్డ్ కప్లో అర్జెంటీనా విశ్వరూపం
FIFA World Cup: గ్రేటెస్ట్ ఆఫ్ ఆల్ టైమ్.. లియోనల్ మెస్సీ ఫిఫా వరల్డ్ కప్లో విశ్వరూపం చూపించాడు. డిఫెండింగ్ ఛాంపియన్ అర్జెంటీనాను ఒంటిచేత్తో గెలిపిస్తూ చరిత్ర సృష్టించాడు.బుధవారం జరిగిన గ్రూప్-జే లీగ్ మ్యాచ్లో అర్జెంటీనా 3-0 తేడాతో అల్జీరియాపై ఘన విజయం సాధించింది. ఈ మ్యాచ్లో మెస్సీ తన కెరీర్లోనే మొదటిసారి వరల్డ్ కప్ వేదికగా అద్భుతమైన ‘హ్యాట్రిక్ గోల్స్’ సాధించి రికార్డుల దుమ్మురేపాడు.
మ్యాచ్లోని 17, 60, 76వ నిమిషాల్లో గోల్స్ చేసిన మెస్సీ.. మెగా టోర్నీ చరిత్రలో అత్యధిక గోల్స్ చేసిన జర్మనీ లెజెండ్ మిరోస్లావ్ క్లోజ్ రికార్డును సమం చేశాడు. వీరిద్దరూ ఇప్పుడు 16 గోల్స్తో టాప్లో ఉన్నారు. ఆ తర్వాతి స్థానాల్లో రొనాల్డో (15), గెర్డ్ ముల్లర్ (15), ఎంబాపే (14) ఉన్నారు. రికార్డులు అక్కడితో ఆగలేదు! ఐదు వేర్వేరు వరల్డ్ కప్స్లో గోల్స్ సాధించిన రెండో ప్లేయర్గా పోర్చుగల్ స్టార్ క్రిస్టియానో రొనాల్డో సరసన మెస్సీ నిలిచాడు. అంతేకాదు, అర్జెంటీనా తరఫున మెస్సీ వరల్డ్ కప్లో అరంగేట్రం చేసి సరిగ్గా 20 ఏళ్లు పూర్తయిన రోజే ఈ మైలురాళ్లను అందుకోవడం విశేషం!
వచ్చే వారం 39వ పడిలోకి అడుగుపెడుతున్న మెస్సీకి.. అంతర్జాతీయ కెరీర్లో ఇది 200వ మ్యాచ్ కావడం మరో విశేషం. తన కెరీర్లో రికార్డు స్థాయిలో 6వ వరల్డ్ కప్ ఆడుతున్న మెస్సీ.. మ్యాచ్ ఆరంభం నుంచే గ్రౌండ్లో చిరుతలా కదిలాడు. డి పాల్ అందించిన పాస్ను తొలి గోల్గా మలిచిన మెస్సీ, సెకండాఫ్లో రీబౌండ్ బాల్ ద్వారా రెండో గోల్ కొట్టాడు. ఆ తర్వాత పెనాల్టీ బాక్స్ వెలుపలి నుంచి మెరుపు వేగంతో బంతిని గోల్ పోస్ట్లోకి పంపి హ్యాట్రిక్ పూర్తి చేశాడు.
ఇక టోర్నీలో జరిగిన మరో మ్యాచ్లో ఆస్ట్రియా 3-1 తేడాతో జోర్డాన్పై విజయం సాధించింది. ఆస్ట్రియా తరఫున రొమానో షిమిడి, యజాన్ అలరాబ్, మార్కో అర్నాటోవిచ్ గోల్స్ చేయగా.. జోర్డాన్ తరఫున అలీ ఒవన్ ఏకైక గోల్ అందించాడు.ఏది ఏమైనా.. ఈ వరల్డ్ కప్లో మెస్సీ సృష్టిస్తున్న రికార్డుల సునామీ చూస్తుంటే అర్జెంటీనా మరోసారి కప్ కొట్టేలానే కనిపిస్తోంది!
