Abhishek Nayar: వైభవ్‌ సూర్యవంశీకి ఒక్క ఛాన్స్‌ ఇవ్వండి.. గంభీర్‌, శ్రేయస్‌ అయ్యర్‌కు అభిషేక్‌ నాయర్‌ విజ్ఞప్తి
అభిషేక్‌ నాయర్‌ విజ్ఞప్తి
Abhishek Nayar: భారత యువ సంచలనం వైభవ్‌ సూర్యవంశీకి టీమ్‌ఇండియాలో అవకాశం ఇవ్వాలనే డిమాండ్‌ వినిపిస్తోంది. వెస్టిండీస్‌తో జరుగుతున్న ఐదు టీ20ల సిరీస్‌లో చివరి మ్యాచ్‌లోనైనా ఈ 15 ఏళ్ల కుర్రాడిని ఆడించాలని భారత మాజీ అసిస్టెంట్‌ కోచ్‌ అభిషేక్‌ నాయర్‌ సూచించాడు. ముందుగా సిరీస్‌ను గెలుచుకుని, చివరి మ్యాచ్‌లో వైభవ్‌కు అవకాశం ఇవ్వాలని జట్టు మేనేజ్‌మెంట్‌కు విజ్ఞప్తి చేశాడు.
ప్రస్తుతం భారత్‌ ఈ సిరీస్‌లో 2-1తో ఆధిక్యంలో ఉంది. తొలి మ్యాచ్‌లో ఎనిమిది వికెట్ల తేడాతో గెలిచిన భారత్‌.. రెండో మ్యాచ్‌లో ఆరు వికెట్ల తేడాతో ఓటమి చవిచూసింది. మూడో టీ20లో 14 పరుగుల తేడాతో విజయం సాధించి మళ్లీ ఆధిక్యంలోకి వచ్చింది.
నాలుగో టీ20లో గెలిచి సిరీస్‌ను 3-1తో సొంతం చేసుకుంటే, చివరి మ్యాచ్‌లో వైభవ్‌ సూర్యవంశీని ఆడించే అవకాశం ఉంటుందని నాయర్‌ అభిప్రాయపడ్డాడు. ఇప్పటివరకు ఈ సిరీస్‌లో వైభవ్‌కు తుది జట్టులో చోటు దక్కలేదు. ఓపెనర్లుగా అభిషేక్‌ శర్మ, సంజూ శాంసన్‌లకే జట్టు మేనేజ్‌మెంట్‌ అవకాశాలు ఇస్తోంది.
అభిషేక్‌ శర్మపై ప్రశంసలు
మూడో టీ20లో అభిషేక్‌ శర్మ 69 పరుగులతో చెలరేగి భారత్‌ విజయంలో కీలక పాత్ర పోషించాడు. తొలి రెండు మ్యాచ్‌ల్లో పెద్దగా రాణించని అతడు.. మూడో మ్యాచ్‌లో ఆరు ఫోర్లు, ఐదు సిక్సర్లతో తన సత్తా చాటాడు. వెస్టిండీస్‌ స్పిన్నర్‌ రోస్టన్‌ చేజ్‌ తొలి రెండు మ్యాచ్‌ల్లో అభిషేక్‌ను ఔట్‌ చేశాడు. అయితే మూడో మ్యాచ్‌లో అభిషేక్‌ దీటుగా బదులిచ్చాడు. ప్రత్యర్థి బౌలర్‌ వ్యూహాలను అర్థం చేసుకుంటూ, అవసరమైనప్పుడు ఓపికగా ఆడగలగడం అభిషేక్‌ ప్రత్యేకత అని నాయర్‌ ప్రశంసించాడు. బంతిని బట్టి తన ఆటను మార్చుకుంటూ బౌలర్‌పై ఒత్తిడి పెంచగల సామర్థ్యం అభిషేక్‌కు ఉందని పేర్కొన్నాడు. భారత్‌-వెస్టిండీస్‌ జట్ల మధ్య నాలుగో టీ20 బుధవారం హైదరాబాద్‌లో జరగనుంది. ఈ మ్యాచ్‌లో భారత్‌ గెలిస్తే సిరీస్‌ సొంతమవుతుంది. దీంతో చివరి మ్యాచ్‌లో వైభవ్‌ సూర్యవంశీకి అవకాశం దక్కుతుందా? అన్నది ఆసక్తికరంగా మారింది.
