Hardik Pandya: భారత స్టార్ ఆల్రౌండర్ హార్దిక్ పాండ్యా సుదీర్ఘ విరామం తర్వాత అంతర్జాతీయ క్రికెట్లోకి అద్భుతంగా పునరాగమనం చేశాడు. సెప్టెంబర్ 26, 2025 తర్వాత తన తొలి పోటీ మ్యాచ్ను మంగళవారం (డిసెంబర్ 9) కటక్లో దక్షిణాఫ్రికాతో ఆడిన పాండ్యా, తనదైన శైలిలో మెరిశాడు. కేవలం 28 బంతుల్లోనే 6 ఫోర్లు, 4 సిక్సర్ల సహాయంతో 59 పరుగులు చేసి అజేయంగా నిలిచాడు. బ్యాటింగ్తో పాటు బౌలింగ్లోనూ రాణించిన హార్దిక్, తన రెండు ఓవర్లలో 16 పరుగులిచ్చి ఒక వికెట్ తీశాడు. ఈ ఆల్రౌండ్ షోతో భారత్ 101 పరుగుల భారీ తేడాతో విజయం సాధించగా, పాండ్యాకు ప్లేయర్ ఆఫ్ ది మ్యాచ్ అవార్డు లభించింది.
ఈ సిరీస్లోని రెండో టీ20 మ్యాచ్ గురువారం (డిసెంబర్ 11) మన్లపూర్లోని మహారాజా యాదవీంద్ర సింగ్ అంతర్జాతీయ క్రికెట్ స్టేడియంలో జరగనుంది. ఈ మ్యాచ్లో బరోడాకు చెందిన ఈ 32 ఏళ్ల క్రికెటర్ (హార్దిక్ పాండ్యా) ఒకే ఒక్క వికెట్ తీయగలిగితే, చరిత్ర పుటల్లోకి ఎక్కే అవకాశం ఉంది. 2016 జనవరిలో ఆస్ట్రేలియాపై టీ20 అరంగేట్రం చేసిన పాండ్యా, నేటి మ్యాచ్లో ఒక వికెట్ తీస్తే టీ20 అంతర్జాతీయ క్రికెట్లో 100 వికెట్ల క్లబ్లో చేరతాడు. అప్పుడు అర్ష్దీప్ సింగ్, జస్ప్రీత్ బుమ్రా తర్వాత టీ20ల్లో ఈ మైలురాయిని చేరుకున్న మూడో భారత ఆటగాడిగా నిలుస్తాడు. 100వ వికెట్లతో పాటు, పాండ్యా మరో అరుదైన రికార్డును కూడా సృష్టిస్తాడు. టీ20లలో 1000 పరుగులు, 100 వికెట్లు సాధించిన తొలి భారత క్రికెటర్గా చరిత్ర లిఖించనున్నాడు. ప్రస్తుతం ప్రపంచవ్యాప్తంగా కేవలం నలుగురు ఆటగాళ్లు (బంగ్లాదేశ్కు చెందిన షకీబ్ అల్ హసన్, ఆఫ్ఘనిస్తాన్ మొహమ్మద్ నబీ, జింబాబ్వే సికిందర్ రజా, మలేషియాకు చెందిన వీరందీప్ సింగ్) మాత్రమే ఈ ఘనతను సాధించారు.
అంతేకాకుండా, రెండో టీ20లో ఒక వికెట్ తీయడం ద్వారా హార్దిక్ పాండ్యా.. 1000 పరుగులు, 100 వికెట్లు, 100 సిక్సర్లు అనే మూడు మైలురాళ్లను పూర్తి చేసిన తొలి భారతీయ మరియు ప్రపంచంలో నాల్గవ క్రికెటర్గా నిలవనున్నాడు. మంగళవారం జరిగిన తొలి టీ20లోనే పాండ్యా 4 సిక్సర్లు కొట్టి 100 సిక్సర్ల మైలురాయిని పూర్తి చేసుకున్న సంగతి తెలిసిందే. మొహమ్మద్ నబీ, సికిందర్ రజా, వీరందీప్ సింగ్ వంటి ఆటగాళ్లు ఇప్పటికే 100 సిక్సర్లను కూడా పూర్తి చేశారు. నేడు ఒక వికెట్ సాధించగలిగితే, టీ20 క్రికెట్లో ఈ ట్రిపుల్ ఘనత సాధించిన అత్యంత అరుదైన ఆటగాళ్ల జాబితాలో హార్దిక్ పాండ్యా చేరతాడు.
