FIFA World Cup: హ్యారీ కేన్ విధ్వంసం.. ఫిఫా వరల్డ్ కప్లో లీనేకర్ రికార్డ్ సమం
ఫిఫా వరల్డ్ కప్లో లీనేకర్ రికార్డ్ సమం
FIFA World Cup: ఫిఫా వరల్డ్ కప్లో ఇంగ్లండ్ జట్టు అదరగొట్టింది! గురువారం జరిగిన గ్రూప్-ఎల్ మ్యాచ్లో క్రొయేషియాపై నాలుగు-రెండు (4-2) తేడాతో ఘన విజయం సాధించింది. 2018 సెమీఫైనల్ ప్రత్యర్థుల మధ్య జరిగిన ఈ పోరు.. ఆరంభం నుంచే అభిమానులకు అసలైన ఫుట్బాల్ మజాను అందించింది.
ఇంగ్లిష్ జట్టు కెప్టెన్ హ్యారీ కేన్ అద్భుత ఫామ్తో జట్టును ముందుండి నడిపించాడు. క్రొయేషియా తరఫున ఐదో వరల్డ్ కప్ ఆడుతున్న 40 ఏళ్ల వెటరన్ ప్లేయర్ లుకా మోడ్రిచ్ చేసిన చిన్న పొరపాటు ఇంగ్లండ్కు పెనాల్టీ లభించేలా చేసింది. దీన్ని హ్యారీ కేన్ 12వ నిమిషంలోనే గోల్గా మలిచాడు. ఆ తర్వాత 42వ నిమిషంలో హెడర్తో మరో సూపర్ గోల్ సాధించాడు.ఈ రెండు గోల్స్తో హ్యారీ కేన్.. వరల్డ్ కప్లో అత్యధిక గోల్స్ చేసిన ఇంగ్లిష్ ప్లేయర్ ‘గ్యారీ లీనేకర్’ పది గోల్స్ రికార్డును సమం చేశాడు. అంతేకాదు, 32 ఏళ్ల హ్యారీ అంతర్జాతీయ కెరీర్లో ఇది 81వ గోల్ కావడం విశేషం!
అయితే క్రొయేషియా అంత ఈజీగా లొంగిపోలేదు. ఇంగ్లండ్కు గట్టి పోటీ ఇస్తూ మార్టిన్ బటురినా 36వ నిమిషంలో, పీటర్ ముసా ఫస్ట్ హాఫ్ ఇంజూరీ టైమ్లో (45+5వ నిమిషంలో) చెరో గోల్ కొట్టారు. దీంతో తొలి హాఫ్ ముగిసేసరికి స్కోరు రెండు-రెండు (2-2) తో సమమైంది.కానీ, సెకండాఫ్లో ఇంగ్లండ్ రూటే మార్చేసింది! కోచ్ థామస్ తుషెల్ ఇచ్చిన స్ఫూర్తితో ప్రతీ అవకాశాన్ని గోల్గా మలచుకుంది. 47వ నిమిషంలో జూడ్ బెల్లింగ్హామ్ కొట్టిన మైండ్ బ్లోయింగ్ క్రాస్ షాట్ క్రొయేషియా డిఫెన్స్ను ఛేదిస్తూ గోల్ పోస్ట్లోకి దూసుకెళ్లింది. ఇక ఆట చివర్లో.. అంటే 85వ నిమిషంలో మార్కస్ రాష్ఫోర్డ్ కొట్టిన మరో మెరుపు షాట్ను ఆపడం క్రొయేషియా గోల్ కీపర్ వల్ల కాలేదు. చివరకు 4-2 తేడాతో క్రొయేషియాపై ఈజీగా గెలిచి, వరల్డ్ కప్లో ఇంగ్లండ్ తన జైత్రయాత్రను ఘనంగా చాటింది!
