ICC Shock to Bangladesh: టీ20 ప్రపంచకప్ మ్యాచులను భారత్ నుండి తరలించాలన్న బంగ్లాదేశ్ విన్నపాన్ని ఐసీసీ తోసిపుచ్చింది. షెడ్యూల్ ప్రకారం నిర్ణయించిన వేదికల్లోనే మ్యాచులు జరుగుతాయని, ఇందులో ఎలాంటి మార్పు ఉండదని ఐసీసీ తేల్చి చెప్పింది. వర్చువల్ సమావేశంలో బంగ్లాదేశ్ బోర్డుతో మాట్లాడిన ఐసీసీ ప్రతినిధులు, ఒకవేళ భారత్కు వచ్చి ఆడేందుకు నిరాకరిస్తే.. నిబంధనల ప్రకారం ఆ మ్యాచులకు సంబంధించిన పాయింట్లను కోల్పోవాల్సి ఉంటుందని హెచ్చరించారు.
భారత్-బంగ్లాదేశ్ క్రికెట్ బోర్డుల మధ్య వివాదం స్టార్ పేసర్ ముస్తాఫిజుర్ రెహమాన్తో మొదలైంది. ఐపీఎల్ నుండి ముస్తాఫిజుర్ను బీసీసీఐ బలవంతంగా పంపించివేసిందని ఆగ్రహం వ్యక్తం చేసిన బంగ్లాదేశ్, తమ ఆటగాళ్లకు భారత్లో భద్రత లేదని ఆరోపించింది. ఈ క్రమంలోనే మ్యాచులను తరలించాలని ఐసీసీని కోరింది. అయితే, ఐసీసీ మాత్రం భద్రతా పరమైన అంశాలపై పూర్తి సంతృప్తి వ్యక్తం చేస్తూ, వేదికల మార్పు అసాధ్యమని పేర్కొంది.
ఐసీసీ నిర్ణయం వెలువడినప్పటికీ, తమకు ఇంకా అధికారిక సమాచారం అందలేదని బంగ్లాదేశ్ క్రికెట్ బోర్డు వర్గాలు చెబుతున్నాయి. గతంలో పాకిస్థాన్ కోసం 'హైబ్రిడ్ మోడల్' అమలు చేసిన విషయాన్ని ప్రస్తావిస్తూ, తమకు కూడా అదే వెసులుబాటు కల్పించాలని బంగ్లాదేశ్ డైరెక్టర్ ఫరూక్ అహ్మద్ డిమాండ్ చేస్తున్నారు. మరోవైపు, భారత్లో ఐపీఎల్ నుంచి తప్పుకున్న ముస్తాఫిజుర్, ఇప్పటికే పాకిస్థాన్ సూపర్ లీగ్ (PSL)లో చేరిపోవడం గమనార్హం.
రెండు దేశాల మధ్య నెలకొన్న ఉద్రిక్తతలు క్రికెట్ మైదానానికి పాకాయి. బంగ్లాదేశ్ ఇప్పటికే తమ దేశంలో ఐపీఎల్ ప్రసారాలను నిషేధించింది. క్రీడల్లో రాజకీయాలు జోక్యం చేసుకోవడం వల్లే ఈ పరిస్థితి తలెత్తిందని ఫరూక్ అహ్మద్ అభిప్రాయపడ్డారు. ప్రస్తుతం ఐసీసీ కఠినంగా వ్యవహరిస్తుండటంతో, బంగ్లాదేశ్ తలవంచి భారత్కు వస్తుందా? లేక టోర్నీ నుండి తప్పుకుంటుందా? అన్నది ఉత్కంఠగా మారింది. ప్రపంచకప్ ప్రారంభానికి సమయం దగ్గర పడుతుండటంతో, ఐసీసీ తీసుకోబోయే తుది నిర్ణయంపై క్రికెట్ అభిమానులందరూ ఆసక్తిగా ఎదురుచూస్తున్నారు.
