Smriti Mandhana: భారత జట్టు కెప్టెన్సీకి నేను సిద్ధం: తొలిసారి మనసులో మాట బయటపెట్టిన స్మృతి మంధాన!

Smriti Mandhana: భారత మహిళా క్రికెట్ జట్టు స్టార్ ఓపెనర్ స్మృతి మంధాన భవిష్యత్తులో టీమిండియా సారథ్య బాధ్యతలు చేపట్టడంపై కీలక వ్యాఖ్యలు చేశారు. అవకాశం వస్తే భారత జట్టుకు కెప్టెన్సీ వహించడానికి తాను ‘పూర్తిగా సిద్ధంగా’ ఉన్నానని ఆమె స్పష్టం చేశారు. ఎడమచేతి వాటం బ్యాటర్ అయిన మంధాన చాలా కాలంగా భారత జట్టులో ప్రస్తుత కెప్టెన్ హర్మన్‌ప్రీత్ కౌర్‌కు డిప్యూటీగా (వైస్ కెప్టెన్) వ్యవహరిస్తున్నారు.

2025 వన్డే ప్రపంచకప్‌లో హర్మన్‌ప్రీత్ కౌర్ సారథ్యంలో భారత్ చారిత్రాత్మక విజయాన్ని అందుకున్నప్పటికీ, ఇతర ఫార్మాట్లలో ఆమెపై కొంత ఒత్తిడి పెరుగుతోంది. ప్రస్తుతం 37 ఏళ్ల వయసున్న హర్మన్ ఫామ్, ముఖ్యంగా టీ20ల్లో ఆశించిన స్థాయిలో లేదు. ఒత్తిడి సమయాల్లో ఒకటి రెండు అద్భుత ఇన్నింగ్స్‌లు ఆడినప్పటికీ, ఓవరాల్‌గా ఆమె వైఫల్యాలు తుది జట్టులో ఆమె స్థానంపైనే ప్రశ్నలు రేకెత్తిస్తున్నాయి. తన రిటైర్మెంట్ గురించిన వార్తలను హర్మన్ కొట్టిపారేస్తున్నా, జట్టులో మార్పులు జరగాలనే చర్చ మాత్రం ఆగడం లేదు. కొంతమంది మాజీ క్రికెటర్లు సైతం హర్మన్‌ప్రీత్ కౌర్ కెరీర్ అత్యున్నత దశలో ఉన్నప్పుడే రిటైర్మెంట్ ప్రకటించి, మంధానకు పగ్గాలు అప్పగించాలని సూచించారు. ఈ నేపథ్యంలో 'ది టైమ్స్ ఆఫ్ ఇండియా'కు ఇచ్చిన ఇంటర్వ్యూలో కెప్టెన్సీకి సిద్ధమేనా అని అడిగిన ప్రశ్నకు మంధాన స్పందిస్తూ.. "అవును, ఖచ్చితంగా.. నేను సిద్ధంగా ఉన్నాను" అని సమాధానమిచ్చారు.

ప్రస్తుతం 30 ఏళ్ల వయసులో, తన కెరీర్ అత్యుత్తమ ఫామ్‌లో ఉన్న మంధానకు మరో నాలుగైదేళ్ల పాటు జట్టును నడిపించే సత్తా ఉంది. కెప్టెన్ కావాలనే తన ప్రతిపాదనను ఆమె బహిరంగంగా వ్యక్తపరచడం ఇదే మొదటిసారి. ఇప్పటికే రాయల్ ఛాలెంజర్స్ బెంగళూరు జట్టుకు రెండుసార్లు ఉమెన్స్ ప్రీమియర్ లీగ్ (WPL) టైటిల్స్ అందించి సక్సెస్ ఫుల్ కెప్టెన్‌గా నిరూపించుకున్న మంధానకు, హర్మన్‌ప్రీత్ తప్పుకున్న తర్వాత బోర్డు నుంచి పూర్తి మద్దతు లభించే అవకాశం ఉంది. తన కెప్టెన్సీ ఫిలాసఫీ గురించి మాట్లాడుతూ.. జట్టులో ఒక సానుకూల వాతావరణాన్ని సృష్టించడం చాలా ముఖ్యమని, ప్రతి ఆటగాడు తమ మనసులోని భావాలను స్వేచ్ఛగా పంచుకునేలా ఉండాలని ఆమె అభిప్రాయపడ్డారు. ఆటగాళ్లకు విలువ, నమ్మకం ఇచ్చినప్పుడే వారు మైదానంలో అత్యుత్తమ ప్రదర్శన చేయగలరని తెలిపారు.

ఈ ఇంటర్వ్యూలో సహచర ఆటగాళ్లతో తనకున్న అనుబంధాన్ని కూడా మంధాన పంచుకున్నారు. ఇటీవల ఇంగ్లాండ్‌తో లార్డ్స్ వేదికగా జరిగిన టెస్ట్ మ్యాచ్‌లో సెంచరీతో రాణించిన యాస్తికా భాటియా.. గతంలో ఏసీఎల్ (ACL) మోకాలి గాయంతో బాధపడుతున్నప్పుడు ఆమెకు ఎలా ధైర్యం చెప్పిందో గుర్తుచేసుకున్నారు. ఏ క్రీడాకారుడికైనా మోకాలి గాయం అనేది మానసికంగా పెద్ద దెబ్బ అని, అందులోనూ హోమ్ వరల్డ్ కప్‌కు ముందు యాస్తికాకు గాయం కావడం మరింత కుంగదీసిందని అన్నారు. ఆ సమయంలో 2017లో తనకు జరిగిన ఏసీఎల్ గాయం గురించి, ఆ తర్వాత తాను మానసికంగా, శారీరకంగా ఎలా బలోపేతమయ్యానో యాస్తికాకు వివరించానని మంధాన చెప్పారు. గాయం నుంచి కోలుకున్న తర్వాతే తన కెరీర్‌లో అత్యుత్తమ క్రికెట్ ఆడానని చెప్పడం వల్ల యాస్తికాలో సరికొత్త ప్రేరణ కలిగి, రిహాబిలిటేషన్ ప్రక్రియను విజయవంతంగా పూర్తి చేయగలిగిందని మంధాన సంతోషం వ్యక్తం చేశారు.