Indian Premier League 2026: ఐపీఎల్ 2026: కేకేఆర్ మాస్టర్ ప్లాన్.. రాణా అవుట్, సైనీ ఇన్!

Indian Premier League 2026: ఐపీఎల్ 2026 సీజన్ ప్రారంభానికి ముందే కోల్‌కతా నైట్ రైడర్స్ (KKR) జట్టులో కీలక మార్పులు చోటుచేసుకున్నాయి. గాయం కారణంగా స్టార్ బౌలర్ హర్షిత్ రాణా ఈ ఏడాది ఐపీఎల్‌కు దూరం కావడంతో, అతని స్థానంలో టీమ్ ఇండియా పేసర్ నవదీప్ సైనీని కేకేఆర్ జట్టులోకి తీసుకుంది. మార్చి 28 నుండి ఐపీఎల్ హడావిడి మొదలుకానున్న నేపథ్యంలో ఈ ప్రకటన వెలువడింది.

భారత జట్టు తరపున ఆడుతున్న హర్షిత్ రాణా, ఫిబ్రవరి 4న నవీ ముంబైలో దక్షిణాఫ్రికాతో జరిగిన టీ20 వరల్డ్ కప్ వార్మప్ మ్యాచ్‌లో గాయపడ్డాడు. గతేడాది జరిగిన మెగా వేలంలో కేకేఆర్ ఇతనిని 4 కోట్ల రూపాయలకు రిటైన్ చేసుకున్న సంగతి తెలిసిందే. అయితే గాయం తీవ్రత ఎక్కువగా ఉండటంతో అతను ఈ సీజన్ మొత్తానికి అందుబాటులో ఉండటం లేదు. అతని స్థానంలో వచ్చిన 33 ఏళ్ల నవదీప్ సైనీని కేకేఆర్ 75 లక్షల రూపాయలకు దక్కించుకుంది. సైనీకి ఐపీఎల్‌లో మంచి అనుభవం ఉంది. గతంలో రాజస్థాన్ రాయల్స్, ఆర్సీబీ జట్ల తరపున ఆడిన సైనీ, ఇప్పటివరకు 32 మ్యాచ్‌ల్లో 23 వికెట్లు తీశాడు.

కేకేఆర్ జట్టులో ఇది రెండో మార్పు. కొద్ది రోజుల క్రితమే ఆకాష్ దీప్ స్థానంలో సౌరభ్ దూబేను జట్టులోకి తీసుకున్న మేనేజ్‌మెంట్, ఇప్పుడు సైనీని చేర్చుకుంది. కేవలం కేకేఆర్ మాత్రమే కాకుండా గుజరాత్ టైటాన్స్ (GT) జట్టులో కూడా మార్పు జరిగింది. గాయపడిన పృథ్వీరాజ్ యర్రా స్థానంలో లెఫ్ట్ ఆర్మ్ పేసర్ కుల్వంత్ ఖేజ్రోలియాను గుజరాత్ జట్టు 30 లక్షల రూపాయలకు ఒప్పందం చేసుకుంది. ఖేజ్రోలియా గతంలో కూడా గుజరాత్ టైటాన్స్ తరపున ఆడిన అనుభవం కలిగి ఉన్నాడు.

మరోవైపు టీమ్ ఇండియాకు సంబంధించి కొన్ని కీలక అప్‌డేట్స్ వచ్చాయి. స్టార్ బౌలర్ జస్ప్రీత్ బుమ్రా తిరిగి జట్టులోకి రావడానికి సిద్ధంగా ఉండగా, అభిషేక్ శర్మ ఆసుపత్రి నుండి డిశ్చార్జ్ అయ్యాడు. ఇటీవల న్యూజిలాండ్‌తో జరిగిన మూడో టీ20లో అభిషేక్ శర్మ, సూర్యకుమార్ యాదవ్ అద్భుత ప్రదర్శనతో భారత్ సిరీస్ విజయం సాధించింది. సూర్యకుమార్ యాదవ్ సుదీర్ఘ నిరీక్షణ తర్వాత ఫామ్‌లోకి వచ్చి జట్టును గెలిపించడం అభిమానుల్లో ఉత్సాహాన్ని నింపుతోంది.